Ohin, loron 28 fulan-setembru viajen aérea internasionál ida husi Darwin, Austrália, tun ba dala uluk iha Aeroportu Internasionál Komandante ein Xefe FALINTIL Kay Rala Xanana Gusmão.
Aeroportu Suai, iha Munisípiu Kovalima ne’e, inaugura ona iha loron 20 fulan-juñu tinan 2017 no atende viajen aérea regulár iha rai-laran entre Dili no Suai.
Ligasaun aérea entre Darwin no Suai, realiza hosi Northern Oil & Gas Austrália (NOGA, sigla iha lian inglés) atu tula rekursus umanus ba plataforma mina-rai nian sira iha Tasi Timor, ne’ebé fó dalan ba empreza ne’e atu harii ninia baze operasaun iha Suai, ne’ebé sei favorese dezenvolvimentu ekonómiku rejiaun ne’e nian.
Pasajeiru ba dahuluk sira, Angus Karoll, Diretór-Jerál NOGA nian no John McDermott, Prezidente McDermott Aviation, kompañia ne’ebé halo transporte elikópteru nian husi aeroportu ba plataforma mina-rai nian sira, no ninia delegasaun sira, simu iha aeroportu husi Ministru Transportes no Komunikasoins, José Agustinho da Silva, Vise-Ministra Finansas, Sara Lobo Brites, Sekretáriu Estadu ba Asuntus Kombatentes Libertasaun Nasionál, Gil da Costa Monteiro ‘Oan Soru’, husi Konsúl Timor-Leste iha Darwin, Francisco Jose Felipe, Prezidente Administrasaun Aeroportu no Navegasaun Aérea Timor-Leste nian (ANATL E.P.-sigla iha lian portugés), Romualdo da Silva, Prezidente Konsellu Administrasaun Autoridade Aviasaun Sivíl Timor-Leste nian (AACTL, sigla iha lian portugés), Sabino Henriques, no husi Administradór Munisípiu Kovalima nian.
Diretór-Jerál NOGA nian hatudu ninia “ninia laran haksolok tanba bele partisipa iha biban ida-ne’e” no “harii ninia baze operasaun sira iha fatin ida-ne’e”, ne’ebé “uluk kedas sai nu’udar komapañia ne’e ninia hakarak”, ne’ebé sei permite ba kompañia ne’e “hela besik liután” ba plataforma mina-rai nian sira.
Angus Karoll, hateten katak NOGA “sei investe iha kapasitasaun rekursus umanus timoroan sira” no empreza ne’e hakarak atu “hela iha Timor-Leste ba tempu naruk, dezenvolve sira-nia negósiu sira iha país ne’e no tulun povu timoroan”.
Angus Karoll hateten mós katak “hori uluk to’o oras ne’e ema timoroan sira laran-di’ak tebes ba australianu sira” no hodi hanoin hikas fali apoiu Timor-Leste nian ba Austrália durante Funu Mundiál Daruak, iha ne’ebé timoroan rihun barak maka fó sira nia moris hodi luta hamutuk ho australianu sira. Hodi garante katak ohin nia “sente orgullu hodi fó-fali buat ruma ba komunidade ne’e, serbisu hamutuk ho Timor-Leste atu dezenvolve rekursus umanus no dezenvolve negósiu sira ho sustentabilidade”.
Prezidente ANATL esplika katak “viajen áerea NOGA nian la’ós viajen komersiál ida, maibé ligasaun áerea ida atu fasilita de’it operasaun sira empreza ne’e nian iha Tasi Timor no tula ninia serbisu na’in sira ne’ebé mai husi Austrália ba Suai no husi ne’ebá ba fali plataforma mina-rai nian sira”.
Ministru Transportes no Komunikasoins, hodi Governu Timor-Leste nia naran, hato’o ninia agradesimentu boot ba NOGA ba ninia eskolla no fiar hodi hala’o operasaun iha aeroportu ida-ne’e” no nia hateten katak “loron ida-ne’e hanesan loron istóriku ida ba povu Timor-Leste, liuliu ba komunidade Suai nian” tanba ohin-loron “ita haree rasik viajen áerea direta NOGA nian husi Darwin mai Aeroportu Internasionál Komandante ein Xefe FALINTIL Kay Rala Xanana Gusmão”.
José Agostinho da Silva ko’alia kona-ba “importánsia viajen áerea NOGA ba ekonomia nasionál no apoiu ba progresu ekonómiku populasaun rejiaun Suai nian”. Nia hatutan katak ligasaun áerea ida-ne’e “bele mós dada kompañia áerea seluk atu hala’o operasaun ba Suai ba transporte regulár, turizmu no objetivu seluk. Nia agradese mós ba entidade sira hotu, iha nivel nasionál ka iha Munisípiu Kovalima, inklui mós Primeiru-Ministru, Taur Matan Ruak, eis-Prezidente Repúblika Kay Rala Xanana Gusmão, ne’ebé mak apoiu maka’as ba pedidu NOGA nian atu hala’o operasaun iha Suai”.