Prezidente Repúblika, Francisco Guterres Lú Olo, promulga ona Orsamentu Jerál Estadu nian (OJE) ba tinan 2018 ohin, loron 27 fulan-setembru .

OJE ne’ebé hetan ona promulgasaun ne’e ninia montante totál maka dolar amerikanu millaun 1.279,6 no inklui hotu reseita no despeza hotu-hotu Estadu no Seguransa Sosiál Timor-Leste nian husi loron 1 fulan-janeiru to’o loron 31 fulan-dezembru tinan 2018.

Orsamentu ne’e fahe tuir kategoria no montante hirak tuirmai ne’e: Vensimentu no Saláriu, hamutuk dolar amerikanu millaun 200,253; Beins no Servisu, hamutuk dolar amerikanu millaun 354,031; Transferénsias Públikas hamutuk dolar amerikanu millaun 324,222; Kapitál Menór hamutuk dolar amerikanu millaun 5,117 no Kapitál Dezenvolvimentu nian (ne’ebé inklui Fundu Infraestrutura no Empréstimu sira) hamutuk dolar amerikanu millaun 393,748.

Francisco Guterres Lú Olo deklara ona katak nia promulga OJE ne’e tanba tuir ninia análize “la-iha fundamentu ruma atu husu fiskalizasaun preventiva kona-ba konstitusionalidade no legalidade” husi dokumentu ne’e no ne’ebé sei “permite ba Estadu tama iha prosesu normál ezekusaun orsamentál nian”.

Prezidente Repúblika hateten katak OJE ba tinan 2018 ne’e ninia objetivu mak atu selu empreza sira, atu nune’e bele kria tan postu serbisu nian no aumenta ninia dezempeñu ekonómiku iha nivel nasionál”. Nia hatutan mós katak “orsamentu ida-ne’e sei permite ba Estadu atu kumpre ninia obrigasaun prioritáriu sira, liuliu obrigasaun ba sidadaun sira ne’ebé vulneravel liu, veteranu sira, benefisiáriu sira husi programa Bolsa Inan nian [Bolsa da Mãe], rezolve pagamentu sira ba ospitál internasionál no selu kombustivel ba jeradór sira”.