Ministériu Finansas hala’o sesaun traballu nian ida ho Diretór-Jerál sira, Diretór Administrasaun no Finansas sira, pontu vokál sira atu halo planeamentu kona-ba orsamentu instituisaun Estadu sira ninian iha loron 25 fulan-setembru, iha auditóriu Ministériu Finansas nian.

Sesaun traballu nian ne’e ninia objetivu mak atu disemina prosesu sira no halo prosedimentu kona-ba preparasaun OJE tinan 2019 no distribui limite ne’ebé tau keta-ketak ona ba liña ministeriál hotu, servisu fundu autónomu sira no instituisaun Estadu nian hotu-hotu. Limite másimu ne’e fahe hafoin Konsellu Ministrus halo aprovasaun, iha sorumutuk loron 21 fulan-setembru nian, ba limite másimu ne’ebé tau hamutuk ho totál dolar amerikanu millaun rihun 1,35 (valór ida-ne’e la inklui empréstimu sira) hodi finansia despeza sira Estadu nian durante tinan 2019.

Montante totál husi despeza hirak ne’ebé prevee ne’e fahe ba kategoria no montante sira tuirmai ne’e: USD millaun 199,57 ba saláriu no vensimentu; USD millaun 305,2 ba beins no servisu (inklui Fundu Dezenvolvimentu Kapitál Umanu); USD millaun 622.36 ba transferénsia públika; USD millaun 4  ba Kapitál Menór; USD millaun 218.87 ba Kapitál Dezenvolvimentu;

Konsellu Ministrus mós define prioridade sira ba tinan 2019, ne’ebé sei hasa’e produsaun agríkola  atu haforsa seguransa ai-han no hamenus nutrisaun-ladi’ak; promove edukasaun no formasaun ne’ebé inkluziva, iha kualidade no orienta ba merkadu; haforsa servisu saúde ho kualidade no inkluzaun; dezenvolve infraestrutura bázika bee moos no saneamentu, estrada (nasionál no rurál sira), eletrisidade, telekomunikasaun (fibra ótika), portu no aeroportu; haforsa instituisaun sira no promove desentralizasaun administrativa; promove dezenvolvimentu setór turizmu, promove ambiente negósiu nian ida ne’ebé di’ak atubele dezenvolve investimentu husi setór privadu.

Liña ministeriál hotu-hotu, servisu ho fundu autónomu sira, autoridade munisipál no instituisaun Estadu nian hotu-hotu, tuir kalendáriu ne’ebé mak aprova ona iha sorumutuk Konsellu Ministrus, sei submete sira-nia proposta kona-ba orsamentu hamutuk ho planu asaun anuál ba Ministériu Finansas no ba Unidade Planeamentu, Monitorizasaun no Avaliasaun (UPMA) husi Gabinete Primeiru-Ministru nian iha loron 21 fulan-outubru tinan 2018, atu halo análize ne’ebé kle’an ba programa no despeza sira husi órgaun governamentál ida-idak.

Atu asegura aliñamentu entre orsamentu, programa no prioridade nasionál sira, Governu sei estabelese komité ida ba revizaun polítika, atu diskute fundamentu husi proposta orsamentu nian no programa ba setór xave sira, atu nune’e bele promove rasionalidade no kualidade husi OJE tinan 2019 nian.