Deklarasaun Porta-vóz IV Governu Konstitusional iha 14 Janeiru 2010
Sekretáriu Estadu Konselhu Ministrus
no Porta-Vóz Ofisiál Governu Timór-Leste
Díli, 14 Janeiru 2010
Governu Timór-Leste hato’o kondolênsias ba Povu Haiti
Lori Governu no povu Timór-Leste nia naran, Primeiru-Ministru S.E. Sr. Xanana Gusmão, ohin hato’o kondolênsias ba povu Haiti tanba foin hetan dezastre boot, rai nakdoko.
Iha karta ne’ebé haruka ba Primeiru-Ministru Haiti, S.E. Jean-Max Bellerive, Sr.Gusmão hatete katak povu Timór-Leste sente “hakfodak no laran triste tebes” wainhira sira rona katak rai-nakdoko maka’as no nia impaktu aat tebetebes. Nia dehan mós katak nia fiar ba povu Haiti tomak, mane ka feto nia “korajen no resistênsia”, no expresa experansa katak ho tempu, sira sei bele rekupera fali husi rekonstrusaun.
Povu Timór-Leste, ho laran tomak no domin tomak, hamriik hamutuk hatudu solidariedade ba maun-alin sira ne’ebé iha tempu difísil ida ne’e hetan susar no térus boot iha Haiti.
