Governu Timor-Leste

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 21 fulan-Agostu tinan 2018

Konsellu Ministrus hala’o sorumutuk iha Palásiu Governu, iha Dili, no aprova ona Proposta kona-ba Rezolusaun Governu nian, ne’ebé aprezenta husi Primeiru-Ministru, Taur Matan Ruak, kona-ba nomeasaun Xanana Gusmão hanesan Reprezentante Espesiál Timor-Leste nian atu konklui prosedimentu hirak ne’ebé presiza ba ratifikasaun Tratadu entre Repúblika Demokrátika Timor-Leste no Austrália ne’ebé estabelese ketan tasik iha Tasi Timor, akizisaun interese iha kampu petrolíferu sira no selebrasaun akordu sira kona-ba dezenvolvimentu kampu petrolíferu sira Greater Sunrise nian. Reprezentante Espesiál ne’e sei reprezenta Estadu Timor nian iha kestaun sira ne’ebé relasiona ho Tratadu ne’e rasik, sei negosia ho hanoin atubele adkire interese partisipativu iha ativu petrolíferu balun iha Tasi Timor, ne’ebé maka hein katak bele fó kontribuisaun ho forma desizivu ba dezenvolvimentu indústria petrolífera moderna ida iha Timor-Leste no, tuirmai, ba dezenvolvimentu indústria sira seluk no setór ekonómiku sira ne’ebé iha relasaun. Reprezentante Espesiál ne’e mós sei lidera prosesu negosiasaun no selebrasaun ho Austrália no ho empreza petrolífera, akordu sira ne’ebé presiza ba dezenvolvimentu kampu Greater Sunrise, afirma fila-fali intensaun Governu nian atu kampu Greater Sunrise dezenvolve liuhusi dada kadoras gás naturál nian ba parte tasi mane Timor-Leste nian no ba konstrusaun no operasaun fábrika prosesamentu gás naturál nian iha Beasu.

Konsellu Ministrus aprova ona Proposta kona-ba Rezolusaun Governu nian ne’ebé aprezenta husi Ministru Negósius Estranjeirus no Kooperasaun, Dionísio da Costa Babo Soares, kona-ba nomeasaun Tomás Cabral, hanesan Reprezentante Espesiál Governu RDTL nian ba Repúblika Giné-Bisau atu halo identifikasaun kona-ba nesesidade Estadu ida-ne’e nian atu hala’o eleisaun ne’ebé livre no demokrátika ne’ebé sei realiza iha loron 18 fulan-novemnbru tinan 2018. Hodi rekoñese kontributu importante ne’ebé misaun apoiu nian rua husi Timor ba prosesu eleitorál Giné-Bisau nian, ne’ebé harii iha tinan 2013 no 2014, fó ona atu hala’o eleisaun livre no justu iha país ida-ne’e, atu nasaun ne’e fila-fali ba normalidade demokrátika no atu RDTL hetan prestíjiu internasionál, no hodi afirma determinasaun Governu Timor-Leste nian atu kontribui ba pás no seguransa internasionál, liuhusi fó apoiu ba asaun sira ne’ebé promove konsolidasaun rejime demokrátiku sira, respeitu ba direitu umanu no fortalesimentu Estadu sira ne’ebé Timor-Leste mantein relasaun amizade no kooperasaun nian ho sira.

Konsellu Ministrus analiza ona Proposta kona-ba Rezolusaun Governu nian ne’ebé iha relasaun ho pagamentu kontribuisaun sosiál ne’ebé sai hanesan obrigasaun traballadór Estadu nian sira, ne’ebé aprezenta husi Ministra Solidariedade Sosiál no Inkluzaun, Armanda Berta dos Santos. Proposta ne’ebé aprezenta ne’e buka atu define senáriu hirak ne’ebé bele mosu ba retensaun mensál ba Seguransa Sosiál no pagamentu kontribuisaun sosiál globál sira husi traballadór Estadu nian sira. Rejime kontributivu Seguransa Sosiál vigora ona dezde loron 1 fulan-agostu tinan 2017. Tuir fali mai Konsellu Ministrus sei analiza fila-fali proposta ne’e.

Governu aprova ona Projetu kona-ba Deliberasaun Konsellu Ministrus nian ne’ebé hili eis-Prezidente Repúblika no Konselleiru Estadu, Kay Rala Xanana Gusmão, atu reprezenta Governu iha serimónia fúnebre eis-Sekretáriu-Jerál Organizaun Nasoins Unidas, Kofi Annan, nian, exetu karik serimónia sira-ne’e iha karáter privadu, ka iha serimónia omenajen póstuma ba ninia memória ne’ebé maka sei realiza. REMATA