Deklarasaun Porta-vóz IV Governu Konstitusional iha 29 Janeiru 2010
Sekretáriu Estadu Konselhu Ministrus
no Porta-Vóz ofisiál Governu Timór-Leste
Díli, 29 Janeiru, 2010
Komandante Grant Edwards, Xefe Programa Dezenvolvimentu Polísia Timór-Leste (PDPTL), remata ona nia misaun.
Primeiru-Ministru, S.E. Kay Rala Xanana Gusmão ho Governu Timór-Leste hato’o apresiasaun boot tebes ba Komandante Grant Edwards, ne’ebé foin hakotu nia servisu iha Programa Dezenvolvimentu Polísia Timór-Leste (PDPTL).
Komandante Edwards hatudu ona nia profisionalizmu no dedikasaun ne’ebé aas tebes liuhusi nia lideransa ba PDPTL, durante periodu ne’ebé krítiku iha Timór-Leste nia istória, ne’ebé merese duni fó valor ba nia, tanba nia kontribui maka’as hodi hetan rezultadus di’ak husi esforsus ne’ebé halo atu profesionaliza Forsas Polísia Timór-Leste (PNTL) hodi nune’e bele hala’o knaar atu alkansa páz no estabilidade ne’ebé metin liután iha Timór-Leste.
PDPTL kaer papél sentrál hodi hametin kapasidade PNTL nian iha áreas treinu/formasaun, finansas, planeamentu estratéjiku, prosesus organizasaun nian no prosedimentus ho dezenvolvimentu legál, no mós estabelesimentu rejime karreira i promosaun ba PNTL; kontributus tomak ne’ebé tulun prosesu transferênsia graduál responsabilidade komandu husi UNPOL ba PNTL.
Sekretáriu Estadu Pereira dehan “Komandante Edwards bele fila bá ho onra boot tanba ami rekonhese tebes duni nia kontributus ba nasaun ida ne’e, no nia papél atu hametin liután lasus/relasoens amizade no kooperasaun entre Austrália ho Timór-Leste. Polísia Federál Austrália sei kontinua hanesan parseiru importante Timór-Leste nian; hodi kontribui ba servisus polísia nian ne’ebé profisionál no responsável liután.”
