Iha loron 16 no loron 17 fulan-agostu Institutu Defeza Nasionál Timor-Leste (IDN-TL) organiza konferénsia internasionál ida ba kuadru sosiedade timoroan hotu, iha auditóriu Ministériu Finansas, ho objetivu atu promove importánsia vitál tasi nian ba país, hodi afirma sékulu XXI hanesan períodu ida ne’ebé Timor-Leste sei orienta-an ba tasi.

Konferénsia ne’e ninia objetivu atu reflete ba krítika ida kona-ba nesesidade polítika nasionál nian ida ne’ebé haree liu ba tasi bainhira nu’udar elementu fundamentál iha ámbitu prosesu (re)konstrusaun Estadu nian no transformasaun sosiedade timoroan nian.

Proposta husi reflesaun ne’e sei foka liu ba valór fundamentál Tasi nian ba Timor-Leste, ne’ebé haree liu ba ninia relevánsia jeopolítika no jeoestratéjika iha kontestu interese estratéjiku husi poténsia oin-oin (globál, rejionál no sub-rejionál), ne’ebé konsidera fenómenu globalizasaun no ninia ramu/sanak sira, liuliu, risku no ameasa ba Estadu sira ne’ebé konsidera fráku hanesan Timor-Leste.

Konferénsia internasionál ne’e nia tema sentrál maka “Timor-Leste: Sékulu Tasi nian”, no subtema maka: “kontributu husi setór nasionál sira ho potensialidade atu hakbiit seguransa no dezenvolvimentu nasionál sira”, no “forma sira atu aumenta servisu no indústria infrestrutura estratéjika nasionál sira”.

Durante konferénsia loron rua ne’e sei ko’alia kona-ba tema 10 ne’ebé aprezenta husi oradór nasionál no internasionál sira ho objetivu atu promove no estimula reflesaun no debate kona-ba asuntu sira tasi nian hodi haree ba kontestu nasionál bainhira tama ba sékulu XXI, hodi harii baze sira ba kriasaun Estratéjika Nasionál ba Tasi, identifika no promove atividade estratéjika sira iha nivel setoriál atu kontinua objetivu sira dezenvolvimentu nasionál nian ne’ebé estabelese iha kuadru ho estratéjia nasionál ida ba Tasi, no promove debate públiku nasionál iha sosiedade timoroan nia leet kona-ba asuntu sira ne’ebé pertense ba Tasi, ba Seguransa no ba Dezenvolvimentu Nasionál, ho forma integrada.

Rezultadu husi konferénsia ida-ne’e sei publika iha revista sientífika ida ne’ebé sei tau-hamutuk aprezentasaun husi oradór sira no transkrisaun husi debate sira ne’ebé konklui husi partisipante sira.