Governu Konstitusionál VIII hala’o sorumutuk ohin, iha loron 7 fulan-agostu tinan 2018, iha Palásiu Governu iha Dili, atu debate kona-ba prioridade prinsipál sira ba Orsamentu Jerál Estadu tinan 2019 nian.

Iha sorumutuk, ne’ebé partisipa husi membru Governu sira hotu, Primeiru-Ministru aprezenta nu’udar prioridade prinsipál sira Ezekutivu nian kontensaun ba despeza no ba aumentu reseita la’ós petrolífera sira, atu hamenus dependénsia ba reseita sira husi setór ida-ne’e no esforsu boot ida husi Ministériu sira hotu atu asegura aumentu ba kreximentu ekonómiku, hamenus ki’ak no harii postu foun sira serbisu nian.

Prioridade ba tinan 2019 iha área saúde nian maka rekursu umanu sira, ho aumentu ba númeru profisionál sira husi setór ida-ne’e no fó atensau liután iha espesializasaun tuir nesesidade país nian, atu hamenus nesesidade ba halo tratamentu iha rai-li’ur.

Iha komunikasaun sosiál nian, Governu hakarak aposta liu ba dezenvolvimentu Ajénsia Tatoli, hodi transforma Ajénsia Tatoli ba Ajénsia Notísia nian ida ne’ebé ho referénsia iha país no ba rai-li’ur.

Iha setór infraestrutura sira, Governu ne’e sei fó atensaun liu ba asesu bee moos ba populasaun hotu-hotu, ba dezenvolvimentu no hadi’a estrada no ponte sira, liuliu ba estrada rurál no investimentu enerjia renovalvel sira.

Prioridade sira ba tinan 2019 iha área kultura nian sei kria sentru kulturál ida iha Likisá no halo reabilitasaun ba prizaun Ai Pelu, harii biblioteka nasionál no dezenvolve turizmu istóriku-kulturál.

Governu ne’e hakarak hadi’a mós mekanizmu rejistu nian no kriasaun kooperativa sira, kria sentru produsaun ida no distribuisaun ba kooperativa sira, harii sentru formasaun rejionál foun ida, hodi kontinua apoia ba kriasaun negósiu husi grupu feto sira no akompaña grupu sira ho susesu ne’ebé boot ba ninia transformasaun ba iha empreza.