Sorumutuk Konsellu Ministrus nian iha loron 1 fulan-agostu tinan 2018
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 1 fulan-Agostu tinan 2018
Konsellu Ministrus hala’o sorumutuk iha Palásiu Governu, iha Dili, no aprova ona Rezolusaun Governu nian, ne’ebé Ministériu Negósius Estranjeirus no Kooperasaun propoin, kona-ba donativu ba Repúblika Indonézia, hamutuk dolar amerikanu 750.000,00 (rihun atus hitu limanulu), tanba rai-nakdoko ho magnitude 6,4 eskala Richter ne’ebé akontese iha illa Lombok, ne’ebé halo ema barak maka sai vítima nune’e mós uma atus ba atus maka hetan estragu no obriga halo evakuasaun ba populasaun rihun resin. Haree ba gravidade husi situasaun ne’e no lasu sira ne’ebé kesi Repúblika Demokrátika Timor-Leste no Repúblika Indonézia, Governu ne’e, ho dalan ida-ne’e, hato’o ninia solidariedade ba povu indonéziu no apoia iha resposta ba nesesidade sira ne’ebé provoka husi destruisaun ne’e.
Governu ne’e mós aprova ona Rezolusaun Governu nian ne’ebé Ministériu Negósius Estranjeirus no Kooperasaun propoin, kona-ba donativu ne’ebé atu fó ba Repúblika Demokrátika Populár Laos, hodi apoia iha resposta ba destruisaun ne’ebé kauza husi barrajen idroelétrika nian ida ne’ebé naksobu iha Provínsia Attapeu. Haree ba lasu sira ne’ebé kesi Repúblika Demokrátika Timor-Leste no Repúblika Demokrátika Populár Laos, nune’e mós gravidade husi situasaun ne’ebé halo ema barak maka mate no lakon no família atus ba atus maka lakon sira-nia hela-fatin, Timor-Leste hato’o ninia solidariedade ba povu Laos nian ho doasaun hamutuk dolar amerikanu 750.000,00 (rihun atus hitu limanulu) ho objetivu atu fó asisténsia umanitáriu ba populasaun sira ne’ebé afetadu. REMATA
