Parlamentu Nasionál remata ona ohin, loron 27 fulan-jullu tinan 2018, apresiasaun ba Programa ne’ebé sei orienta atividade sira Governu Konstitusionál VIII nian durante tinan lima oinmai.

Durante debate loron tolu kona-ba programa ne’e, deputadu sira hato’o ona sira ninia dúvida, sujestaun, esklaresimentu ba Governo no la aprova Mosaun Rejeisaun nian ne’ebé aprezenta husi opozisaun, ho votu kontra 36, abstensaun haat no afavór 25.

Primeiru-Ministru, Taur Matan Ruak, garante ba deputadu sira katak sei “konsidera sira-nia preokupasaun no sujestaun sira”, hodi nune’e bele asegura asaun Governativa ida ne’ebé besik no politikamente inkluziva liután ba orientasaun sira husi Parlamentu Nasionál.

Primeiru-Ministru, durante ninia diskursu maktakak nian, hateten klaru mós katak “debate kona-ba Programa Governu nian ne’e, hatudu ona katak, maski hanoin no ideolojia la hanesan, Bankada Parlamentár hotu-hotu haka’as an tomak atu halo Timor-Leste sai país ida ne’ebé justu, inkluzivu, prósperu no dezenvolvidu liután”.

Programa Governu nian ne’ebé agora hetan ona aprovasaun ne’e hato’o iha rezumu polítika públika prinsipál sira ne’ebé atu adota hodi haforsa no otimiza setór sira governasaun nian no ninia rekursu sira, hodi habadak dalan ne’ebé trasa ona atu transforma vizaun 2030 ba realidade no hatuur iha área fundamentál lima ba futuru nasaun nian:

• Iha área dezenvolvimentu kapitál sosiál nian, programa ne’e aprezenta medida lubun ida atu haforsa ninia potensiál, hodi promove inkluzaun, kapasitasaun, kualifikasaun no saúde;

• Iha área dezenvolvimentu Infraestrutura nian, área ida ne’ebé konsidera importante tebtebes ba dezenvolvimentu ekonómiku no sosiál, Governu hakarak implementa rede infraestrutura nian ida ne’ebé iha kualidade, ho garantia ba kolaborasaun di’ak kustu-benefísiu no nune’e bele sustenta produtividade, kriasaun empregu no dezenvolvimentu setór privadu nian;

• Iha área dezenvolvimentu ekonomia nian, programa ne’e aprezenta medida sira ba ninia modernizasaun no diversifikasaun, hodi haforsa setór produtivu sira ne’ebé la sees husi indústria esensiál tolu – agrikultura, turizmu no mina-rai – ho medida hirak ne’ebé estimula kriatividade, inovasaun, empriendedorizmu, ne’ebé permite aumenta oportunidade rendimentu nian, hadi’a produtividade, kapasidade atu hamosu rikusoin no kria merkadu foun sira;

• Iha área Konsolidasaun Governativa nian, Governu ne’e propoin kontinuasaun husi investimentu iha planeamentu estratéjiku ba ekonomia ida ne’ebé modernu no diversifikadu, ho objetivu atu kria empregu foun rihun 60 kada tinan, redús moris-kiak ba 10% no kreximentu médiu ekonomia liu husi 7%, hodi aumenta kontribuisaun husi setór privadu no produtivu sira, no hodi viabiliza sustentabilidade fiskál.

• Iha área Governasaun Di’ak no kombate hasoru korrupsaun, programa ne’e propoin implementa mekanizmu sira kona-ba avaliasaun, dezempeñu no promosaun  prinsípiu sira transparénsia, responsabilizasaun, integridade no lideransa nian, hodi buka atu aumenta konfiansa iha governasaun ne’e no hasa’e kompeténsia no efisiénsia husi setór públiku.

Primeiru-Ministru hakotu ninia diskursu maktakak nian hodi afirma katak ida-ne’e hanesan “programa Governu nian ida ba Timoroan hotu-hotu ba Timor-Leste ida ne’ebé forte, riku no seguru” no temi filafali kompromisu atu envolve “ema hotu-hotu, tantu iha nivel polítiku no mós nivel organizasaun sosiedade sivíl nian iha ezekusaun programa ne’e nian”.

Atu lee diskursu Primeiru-Ministru nian kona-ba aprezentasaun programa ne’e nian, klike iha ne’e.

Atu lee Primeiru-Ministru nia diskursu maktakak kona-ba aprezentasaun programa nee nian, klike iha ne’e.