Sorumutuk Estraordinária Konsellu Ministrus nian iha loron 20 fulan-jullu tinan 2018
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Estraordinária Konsellu Ministrus nian iha loron 20 fulan-jullu tinan 2018
Konsellu Minsitrus hala’o sorumutuk iha Palásiu Governu, iha Dili, no aprova ona proposta, ne’ebé hato’o husi Ministru Reforma Lejizlativa no Asuntus Parlamentares, Fidelis Maglhães, kona-ba Akordu Finansiamentu Inisiál entre Ajénsia Kooperasaun ba Dezenvolvimentu Millennium Challenge Corporation no Repúblika Demokrátika Timor-Leste, ne’ebé atu disponibiliza fundu sira hodi kria ekipa ida ne’ebé sei nu’udar responsavel ba identifikasaun setór ekonómiku sira ne’ebé dezenvolve hela no hatama iha programa Millennium Challenge Compact. Ekipa ne’e sei hala’o servisu iha fulan 18 to’o fulan 24 nia laran hodi halo programa ne’ebé atu hadi’a kreximentu ekonómiku no hamenus kiak iha Timor-Leste, no sei implementa iha tinan 2020 to’o tinan 2025.
Primeiru-Ministru, Taur Matan Ruak, aprezenta proposta, ne’ebé aprova ona husi Konsellu Minsitrus, kona-ba indikasaun Sérgio Hornai nian hanesan kandidatu ba kargu Komisáriu ba Komisaun Anti-Korrupsaun (KAK). Oras ne’e Parlamentu Nasionál sei hili entre Sérgio Hornai no Komisáriu atuál, Adérito Tilman, ne’ebé Governu propoin iha Sorumutuk Konsellu Ministrus iha loron 13 fulan-jullu tinan 2018.
Governu aprova ona proposta kona-ba Tetu Orsamentál (limite másimu orsamentu nian) ba tinan 2018 ne’ebé aprezenta husi Ministra Fiansas iha ezersísiu, Sara Lobo Brites, ho valór millaun dolár amerikanu hamutuk $1.218. Tetu orsamentál ne’ebé aprova ona, konsidera despeza sira ne’ebé iha relasaun ho estrutura governativa, tusan no kompromisu ne’ebé halo ona no orsamentu adisionál ba Fundu Infraestrutura sira.
Konsellu Ministrus aprova ona Programa Governu Konstitusionál VIII nian, hafoin halo análize ba alterasaun ne’ebé ministériu lubun ida propoin. Programa Governu VIII nian hakarak atu reflete aspirasaun sira husi povu timoroan sira no medida prioritária sira ba dezenvolvimentu sustentavel, fó atensaun liu ba Planu Estratéjiku Dezenvolvimentu 2011-2030, hodi kontribui atu transforma Timor-Leste ba nasaun ida ho rendimentu médiu-aas, iha ne’ebé populasaun sira bele moris ho seguransa no saudavel, matenek no dezenvolvidu. Dokumentu ne’e entrega ba Parlamentu Nasionál iha loron 20 fulan-jullu. REMATA
