Sorumutuk Estraordinária Konsellu Ministrus nian iha loron 13 fulan-jullu tinan 2018
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Estraordinária Konsellu Ministrus nian iha loron 13 fulan-jullu tinan 2018
Governu hala’o sorumutuk iha Palásiu Governu, iha Dili, no analiza ona planu tékniku estratéjiku kona-ba preparasaun Orsamentu Jerál Estadu nian ba tinan 2018, ne’ebé hato’o husi Ministra Finansas iha Ezersísiu, Sara Lobo Brites. Planu ne’ebé hetan ona apresiasaun husi membru Governu sira ne’e aprezenta rekomendasaun ba metodolojia, kalendáriu no opsaun ba senáriu sira no fatór sira ne’ebé determina limite másimu ba Orsamentu Jerál Estadu tinan 2018 nian, haree ba objetivu sira husi Planu Estratéjiku Dezenvolvimentu, sustentabilidade fiskál no ezekusaun orsamentál ne’ebé ho kualidade.
Konsellu Ministrus aprova ona proposta ne’ebé hato’o husi Ministra Finansas iha Ezersísiu kona-ba Dekretu Governu nian ne’ebé relasiona ho alterasaun daruak ba Dekretu n. 1/2018, loron 12 fulan-janeiru kona-ba Ezekusaun Orsamentál iha Rejime Duodésimu. Dekretu Governu ne’ebé hetan ona aprovasaun ne’e ninia objetivu mak introdús ajustamentu sira ne’ebé tenke halo iha ezekusaun orsamentál iha rejime duodésimu nian, hanesan alterasaun ba regra klasifikasaun orgánika atubele reflete orgánika Governu Konstitusionál VIII nian no exesaun atu uza osan husi duodésimu ba pagamentu hirak ne’ebé refere ba pensaun ferik-katuas, invalidés nian no ba benefisiáriu sira programa husi bolsa inan nian [bolsa da mãe].
Ikusliu, Governu aprova ona proposta ne’ebé hato’o husi Ministra Finansas iha Ezersísiu kona-ba limite másimu ba dotasaun orsamentál temporária sira ba fulan-jullu tinan 2018 ho valór dolar amerikanu 88,858,422. REMATA
