Sekretáriu Estadu Konselhu Ministrus no

Porta-vóz Ofisiál Governu Timór-Leste

 

Díli, 9 Novembru 2009

 

Kriasaun Empregu hanesan Prioridade Governu Xanana Gusmão nian ba 2010

 

Kriasaun empregu no formasaun profisionál maka misaun sentrál Governu nian.

Husi Agostu 2007, Sekretaria Estadu ba Formasaun Profisionál no Empregu, promove no implementa kedas ona inisiativas formasaun ho programas kriasaun empregu ne’ebé hetan rezultadus konkretus ba ema rihun-ba-rihun.

Inisiativa “Projetu Trabalhu Intensivu” mesak de’it, konsege kria postus trabalhu ba timór 65.241 iha Paíz laran tomak. Programa kriasaun empregu temporáriu importante liu haré husi manutensaun estradas no valetas, no mós servisu hanesan limpeza iha komunidades laran.

Husi parte seluk projetu “Programa Nasionál ba Jerasaun ka Hetan Renda” la kleur sei komesa, utiliza maun-de-obra ka trabalhadores lokais hodi halo obras públikas iha Timór-Leste, i nia meta ka finalidade mak kriasaun empregu ba ema 50.000 tinatian, ho tempu servisu loron 60, ba trabalhadór ida-ida, durante tinan 4 laran.

Hanesan mós kria empregu, Sekretaria Estadu ba Formasaun Profisionál no Empregu promove daudauk oportunidades formasaun profisionál ba timór-oan sira. Ida ne’e inklui formasaun ba timór-oan 175 iha Sentru Nasionál ba Empregu no Formasaun Profisionál iha Tíbar, iha áreas alvenaria ka pedreiru, eletrisidade, karpintaria, kanalizasaun, konstrusaun sivíl no agrikultura.

To’o agora SEFOPE rejista ona sentrus formasaun 91 iha Distritus 13 Timór-Leste laran tomak ne’ebé fó formasaun kona-ba atividades oioin, hodi benefisia ema 2.469.

Konstrusaun Sentrus Formasaun Profisionál no Empregu lima iha Dili, Baucau, Bobonaro, Oecusse no Ermera permite halo orientasaun profisionál ba jovens timór-oan na’in 5.800 ne’ebé rejista ona, tuir “Programa Empregu ba Jovens”. Inisiativas liu atus-lima kona-ba Estájius Profisionais no formasaun prátika nia rezultadu mak hetan taixa retensaun pursentu 50 husi jovens, ne’ebé sai hotu funsionárius permanentes, hafoin hala’o tiha programa ne’e.

Empregu no formasaun providensia ka oferese mós iha estranjeiru, iha Koreia-du-Sul, ne’ebé timór-oan liu 400 simu ona aprovasaun atu bá servisu. Nune’e mós iha Indonézia, formadores liu ema 100 mak tuir hela formasaun iha setores oioin.

Liga emprezárius ho sira ne’ebé buka empregu ka servisu buat ida ne’e mak oras ne’e implementa daudaun liuhusi Sistema Informasaun Merkadu Trabalhu, iha Distritus barak, envolve inskritus ka ema ne’ebé tau naran to’o 20.000 ne’ebé buka empregu iha 890 emprezas.

Porta-vóz Ofisiál Ágio Pereira dehan “Governu halo progresus boot tebes iha área krítika kona-ba kriasaun empregu ne’e. Maibé, funu boot ida ne’e ba aban-bainrua tenke kontinua trava ka halo nafatin atu bele garante katak bele kria tan empregus. Kombate dezempregu hanesan funu naruk ida i só liuhusi dezenvolvimentu ekonómiku, edukasaun, formasaun hamutuk ho projetus infra-estruturas, mak Governu sei bele ultrapasa ka rezolve dezafiu nasionál boot ida ne’e.”