Governu Konstitusionál VII  kongratula  Ekipa Nasionál Futeból Sub-21 Timor-Leste nian, ne’ebé sai hanesan kampeaun iha Torneiu Hassanal Bolkiah tinan 2018, iha sidade Bandar Seri Begawan, Brunei Darussalam, iha loron 5 fulan-maiu tinan 2018.

”Governu Konstitusionál VII, hakarak felisita ita-nia Ekipa Nasionál Futeból Sub-21, ne’ebé manan  iha Torneiu Hassanal Bolkiah ba Juventude ASEAN nian iha tinan 2018”, deklara Primeiru-Ministru, Marí Alkatiri. “Ne’e foin ba dahuluk, iha istória Timor-Leste nian mak Ekipa Nasionál Futeból Sub-21 joga ba to’o  iha finál no sai nu’udar kampeaun”.

Primeiru-Ministru deklara ona katak  Governu atuál konsidera desportu hanesan área importante ida, ne’ebé ba formasaun umana no iha prosesu harii nasaun. “Programa Governu Konstitusionál VII  nian hatete katak formasaun umana ne’e bazeia ba iha dezenvolvimentu kompeténsia ema no sosiál nian hanesan fiar an rasik, respeitu, responsabilidade, kumpri ba norma sosiál sira, no seluseluk tán”, deklara Marí Alkatiri. Na’i Ulun ne’e hatutan tan katak “Desportu ne’e hanesan meiu ida ba dezenvolvimentu kompeténsia hirak ne’ebá nian, no nune’e mós hanesan área importante ida ba dezenvolvimentu  no hodi halibur populasaun”.

Tuir Programa Governu Konstitusionál VII, kona-ba setór Desportu, Governu sei planeia asaun ba kontinuasaun desportu eskolár iha nível nasionál no desportu komunitáriu iha nível munisípiu nian, hodi kontinua mós apoia partisipasaun iha jogu sira husi universitáriu sira ASEAN no CPLP nian.

Atu dezenvolve mós kondisaun klubu sira nian no instalasaun desportiva eskolár munisipál sira, hodi promove área oin-oin husi desportu infantil no juvenil, hanesan futebol, voleibol, basketbol, ténis, ténis meza, badminton no seluk tan. Governu hakarak mós atu identifika no dezenvolve talentu sira, nune’e mós atu apoia no insentiva alta kompetisaun.

Torneiu Hassanal Bolkiah 2018 hetan promosaun husi Primeiru-Ministru Brunei Darussalam, Sultão Hassanal Bolkiah, ne’ebé dedika ba Juventude husi país membru sira ASEAN nian. Torneiu ida-ne’e hala’o tinan ida dala-rua. Maski seidauk sai membru ASEAN nian, Timor-Leste partisipa iha eventu desportivu ne’ebá hahú kedas iha Restaurasaun Independénsia iha tinan 2002.

Torneiu ne’e hetan mós patisipasaun husi nasaun hitu, Kamboja, Laos, Mianmar, Singapura, Tailándia, Timor-Leste no Brunei Darussalam hanesan país-anfitriaun (uma-na’in). País haat (Filipina, Indonézia, Malázia no Vietname) la konsege garante sira-nia partisipasaun tanba kompromisu ne’ebé halo iha sira-nia liga nasionál sira.

Torneiu ne’e organiza hamutuk husi Ministériu Kultura, Juventude no Desportu husi Brunei Darussalam nian no husi Asosiasaun Nasionál Futebol Brunei Darussala ninian, ne’ebé konta ho apoiu husi Konfederasaun Futebol husi Ázia no Federasaun Futebol ASEAN nian. REMATA