………………………………………………………………………………………………………………
Dili, loron 3 fulan-maiu tinan 2018
Toleránsia Pontu ba Realizasaun Eleisaun Parlamentár tinan 2018
Governu deside hodi fó toleránsia pontu iha sesta-feira mai ne’e, loron 11 fulan-maiu, loron ne’ebé molok realiza eleisaun parlamentár tinan 2018 nian, ba funsionáriu hotu-hotu no ajente husi ministéiru no servisu hirak ne’ebé depende ba ministéiru sira-ne’e, nune’e mós husi institutu no organizmu hirak ne’ebé integra iha administrasaun indireta Estadu nian, atunune’e sidadaun resenseadu sira ne’ebé la hela iha munisípiu ne’ebé sira inskreve ba, bele ba iha tempu ne’ebé loloos hodi ezerse sira-nia direitu votu nian.
Deside mós hodi fó toleránsia pontu iha loron 10, 11, no 14 fulan-maiu tinan 2018 ba funsionáriu hotu-hotu no ajente husi ministériu no servisu hirak ne’ebé depende ba ministéiru sira-ne’e, nune’e mós husi institutu no organizmu hirak ne’ebé integra iha administrasaun indireta Estadu nian ne’ebé hala’o sira-nia resenseamentu iha Rejiaun Administrativa Espesiál Oekusi Ambenu, maibé la hela ka la serbisu iha rejiaun ne’ebá.
Ikusliu, fó mós indikasaun ba dirijente sira husi estabelesimentu ensinu públiku no privadu atu bele fó mós lisensa ne’ebé hanesan kona-ba devér asiduidade ba estudante sira ne’ebé resenseadu iha Rejiaun Administrativa Espesiál Oekusi Ambenu nian ne’ebé la estuda iha rejiaun ne’ebá, atunune’e sira bele ezerse sira-nia direitu votu nian. REMATA