Governu asina ona karta intensaun atu dada fiu tasi-okos (cabo submarino) fibra όtika nian ida entre illa indonézia nian Alor no Timor-Leste, iha serimόnia ida ne’ebé hala’o iha loron 19 fulan-marsu, iha Timor Plaza, iha Dili.

Primeiru-Ministru, Marí Alkatiri, akompaña husi Vise-Ministru Dezenvolvimentu ba Transportes no Komunikasoins, Inácio Freitas Moreira, no reprezentante sira husi empreza rua ne’ebé sai nu’udar responsavel atu dada fiu tasi-okos ne’e, asina ona karta intensaun ne’ebé sei permite ba aumentu asesu no velosidade internet banda larga ba nasaun laran tomak, liuhusi investimentu privadu ida ho montante osan hamutuk maizumenus dόlar amerikanu millaun rihun ida.

Empreza rua ne’e, Moratelindo no Telin, sira kria empreza ida iha Timor-Leste atu jere projetu ne’e, ne’ebé 30% husi ninia asaun sira sei pertense ba Estadu Timor-Leste.

Yogie Bahar, responsavel Telin nian, hateten katak, “iha fulan neen nia laran fibra όtika bele to’o ona iha Timor-Leste laran tomak”. Michael McPhail, responsavel ba Moratelindo nian, hateten klaru katak “diminuisaun kustu no aumentu velosidade iha asesu ba internet”, hodi hatutan katak, projetu ida-ne’e “maka sai nu’udar pasu boot ida ba dezenvolvimentu nasaun ne’e nian”.

Marí Alkatiri afirma katak “Hasai Timor-Leste husi izolamentu ba mundu sai nu’udar prioridade ida husi Governu Konstitusionál VII, ba ida ne’e instalasaun fibra όtika ne’e importante tebes, hodi tulun dezenvolvimentu nasaun ne’e nian no fό benefísiu boot ba sidadaun timoroan tomak”.

Primeiru-Ministru hateten klaru mόs katak ida-ne’e projetu ida ne’ebé depende 100% ba investimentu diretu husi rai-li’ur, “ne’ebé hatudu konfiansa iha nasaun ne’e, no iha impaktu boot ida ba ekonomia nasionál no fasilita kombate ba asimetria sira iha Timor-Leste.

Marka prezensa iha serimόnia ne’e membru Governu sira, Prezidente Parlamentu Nasionál, Korpu Diplomátiku, parseiru dezenvolvimentu nian sira no responsavel sira husi empreza sira husi setόr telekomunikasaun nian.