Iha loron 15 fulan-marsu, Primeiru-Ministru, Marí Alkatiri, akompaña husi Ministru Planu no Finansas, Rui Augusto Gomes, prezide serimónia entrega sertifikadu lisensa ambientál nian no asinatura ba akordu konstrusaun Portu tasi-dilan (baía) Tíbar nian iha munisípiu Likisá.

Portu Tibar, sei harii iha parte loro monu ho kilómetru 10 husi Dili, mak infraestrutura prioritáriu ne’ebé identifika ona iha Planu Estratéjiku Dezenvolvimentu Timor-Leste nian ba tinan 2011-2030 . Konstrusaun terminál ho nivel internasionál ida-ne’e sei hala’o husi Timor Port SA, parseria públiku-privada (PPP) entre konsórsiu Bolloré no Governu Timor-Leste nian, ne’ebé prevee ona kais rua ho kilómetru besik metru 630 ne’ebé sei bele simu kontentór 870.000 resin iha kada tinan.

Ministru Planu no Finansas afirma katak Portu ne’ebé sei halo ne’e “nia objetivu atu fasilita komérsiu no promove dezenvolvimentu ekonómiku país nian”, no hatutan tan katak Bolloré, parseria Governu Timor-Leste nian iha PPP atu halo konstrusaun Portu Tibar, mak “empreza ida ne’ebé mundu koñese ne’ebé sei bele halo konstrusaun ba infraestrutura ida ho nivel mundiál iha investimentu ida hamutuk millaun 500 durante tinan 30 oinmai”.

Primeiru-Ministru hatutan tan katak “importánsia husi projetu ne’e nian ba ekonomia nasionál no kriasaun ba postu sira serbisu nian iha komunidade” no afirma katak “osan Estadu nian atu halo konstrusaun projetu ne’e maihusi rekursu la renovavel sira, husi mina-rai no gás, ne’ebé signifika katak investimentu boot ne’e, obrigatoriamente, tenke hetan rezultadu pozitivu ba nasaun”. Marí Alkatiri garante mós katak “jestaun ambientál projetu ne’e nian merese hetan atensaun boot husi parte Governu VII no VIII, atu nune’e sustentabilidade liga diretamente ba jestaun ambientál”.

Xefe Governu felisita empreza Bolloré no Xina Harbour hanesan responsavel ba konstrusaun Portu Tibar nian, hodi afirma katak laiha dúvida, bainhira Portu Tibar prontu ona, Timor-Leste sei dezempeña knaar importante ida iha rejiaun iha ámbitu transporte marítimu sira no iha dezenvolvimentu komérsiu no indústria nian.