Pedidu Adisionál sira kona-ba Auditoria ba Kámara Kontas TSAFK nian
Prezidénsia Konsellu Ministrus
VII Governu Konstitusionál
..............................................................................................................................
Komunikadu Imprensa
Pedidu Adisionál sira kona-ba Auditoria ba Kámara Kontas TSAFK nian
Iha tersa ne’e, loron 20 fulan-marsu tinan 2018, Primeiru-Ministru, Marí Alkatiri, formaliza ona pedidu kona-ba auditoria ba operasaun jestaun finanseira no konta TIMOR-GAP – Timor Gás & Petróleu, E.P., nian husi atuál Autoridade Nasionál Petróleu no Minerais Timor-Leste (ANPM), no husi Servisu Nansionál Kadastru Timor-Leste nian, ne’ebé maka kobre períodu korrespondente ba lejizlatura dahikus, i.e., husi loron 9 fulan-agostu tinan 2012 to’o loron 14 fulan-setembru tinan 2017.
Pedidu ne’e mai hafoin solisitasaun iha loron 6 fulan-fevereiru no loron 20 fulan-fevereiru atu hala’o auditoria sira ba operasaun jestaun finanseira no konta nian hotu-hotu husi Autoridade Rejiaun Administrativa Espesiál Oekusi Ambenu (ARAEOA), ne’ebé kobre períodu tinan 2016 to’o agora, no Tezouru, Ministériu Obras Públikas, Transportes no Komunikasoins, ADN, Fundu Infraestrutura no Ministériu Turizmu nian, ne’ebé kobre períodu korrespondente ba lejizlatura dahikus.
Iha karta ne’ebé maka dirije ba Prezidente Tribunál Rekursu no Tribunál Superiór Administrativu, Fiskál no Kontas, Juíz Deolindo dos Santos, Primeiru-Ministru justifika kona-ba pedidu auditoria nian hodi deklara katak “jestaun país nian tenke regula, iha momentu hotu-hotu, husi prinsípiu rigór, tranparénsia no responsabilizasaun nian. Lahó exesaun. Tanba ne’e, presiza duni atu garante transparénsia iha Administrasaun Públika, hodi promove kultura rigór no responsabilizasaun nian ida iha jestaun kona-ba rekursu finanseiru sira Estadu nian.” REMATA
