Primeiru-Ministru, Marí Alkatiri, akompaña husi Ministru Turizmu, Manuel Vong no husi Vise-Ministru Turizmu, Rui Menezes da Costa, inaugura ona Sentru Informasaun Turístika iha loron 12 fulan-marsu,

Sentru ne’ebé inaugura ona ne’e lokaliza iha kapitál besik restaurante El Legendário, iha Lesidere, no sei permite turista no potensiál investidór sira atubele hatene fatin istóriku no kulturál prinsipál sira Timor-Leste nian.

Iha ninia intervensaun, Marí Alkatiri hateten katak Timor-Leste labele depende loos de’it ba setór mina-rai nian no tenke buka mekanizmu atu diversifika ekonomia nasionál, hodi salienta “atu iha dezenvolvimentu ekonómiku, tenke iha vizaun transversál ida kona-ba kooperasaun entre setór ekonómiku oioin”.

Primeiru-Ministru hatutan mós katak “setór turizmu tenke halo kooperasaun ho setór sira hanesan agrikultura, komérsiu no indústria atu nune’e iha futuru turizmu Timor nian sei la moris de’it husi produtu hirak ne’ebé importa mai, hodi loke serbisu, no hodi aumenta reseita Estadu nian no hamenus moris-kiak”.

Inaugurasaun ba Sentru Informasaun Turístika ne’e konta mós ho prezensa husi membru Governu nian balu, reprezentante sira husi korpu diplomátiku, parseiru dezenvolvimentu no operadór turístiku sira.