Sekretáriu Estadu Konselho Ministrus i

Portavoz Oficiál Governo Timor-Leste

 

Díli, Dezembru 30, 2009

 

Timór-Leste simu tinan foun 2010

 

Governu hakarak agradese sosiedade sivíl, funsaun públika, Parlamentu Nasionál, Órgauns Soberanus hotu, Doadores, ISF, média no komunidade internasionál tanba sira nia kontribuisaun ba Timór-Leste iha 2009; hodi nune’e Timór-Leste bele haklaken Adeus Konflitu, Benvindu Dezenvolvimentu!

Tinan tuan hanesan tinan ida ne’ebé simboliza mudansa boot iha dinâmika nasionál; ho konsolidasaun estabilidade iha sidades tomak laran, distritus no áreas rurais. Responsabilidades primárias polísia nian transfere ona husi Nasoens Unidas ba forsa polísia Nasionál (PNTL) iha komunidades barak laran, transferênsia ne’e sei kontinua iha tinan 2010 hodi fó liután konfiansa atu mantein armonia.

Obras foun infra-estruturas nian ho osan US$70 milhões Pakote Referendum lori tan konfiansa boot ba setór privadu Timór-nian, estimula ritmu dezenvolvimentu ekonómiku iha Nasaun tomak laran durante últimu trimestre tinan 2009. Inisiativa ne’e foka liu ba konstrusaun estradas, bee, saneamentu, eskolas no projetus kiik no natón ka médiu seluktán. Nia rezultadus boot tebes, tanba kria servisu, estimula ekonomias lokais, aumenta kapasidade téknika iha áreas rurais no inspira komunidades atu sente katak buat ne’e sira nian rasik no sira sente orgulhu ba sira nia rain.

Funsaun Públika sei hetan benefísius iha 2010 ho komisaun funsaun públika ne’ebé foin estabelese; rejimes karreira ne’ebé iha, perfíl funsionárius, kondisoens servisu no salárius ne’ebé di’ak liu; buat hotu ne’ebé kontribui atu perfíl indikadores sai di’ak liután iha finais tinan 2009, inklui hadi’a ezekusaun orsamentál, aumenta produtividade agríkola, no indikadores saúde ne’ebé di’ak, ne’e mak buat balu ne’ebé ami bele temi.

Nomeasaun Komisáriu Komisaun Anti-Korrupsaun nian iha inísius tinan 2010 sei hahú prosesu estabelesimentu Komisaun Anti-Korrupsaun; hodi fó oportunidade ba povu Timór-Leste atu komesa kombate korrupsaun; garante katak tinan 2010 sei alkansa nível kontabilidade ka responsabilizasaun foun ida no edukasaun hasoru korrupsaun, nepotizmu no kronizmu.

Grupus espesífikus no vulneráveis, sei hetan nafatin protesaun iha tinan 2010 ho polítikas sosiais Governu nian ne’ebé forte tebes hanesan pensoens, abitasaun, edukasaun, negósius ki’ik no insentivus iha agrikultura. Despezas maka’as iha infra-estruturas sei hahú prosesu todan atu hari fundasoens metin ne’ebé presiza tebes hodi atrai investimentu internasionál iha turizmu, indústrias oioin no únikas iha Timór-Leste, i planus atu dezenvolve indústria petróleu iha rai laran.

Sekretáriu Estadu Pereira dehan “Ami hato’o ami nia agradesimentu boot ba ema hotu ne’ebé kontribui ba konsolidasaun páz iha 2009, fó sira nia tempu no esforsus tomak atu hametin ita nia instituisoens no kreatividade, dedikasaun i determinasaun atu aselera dalan dezenvolvimentu Timór-Leste.”

“Importante liu, Governu de Xanana Gusmão hanesan de’it kanál ka dalan ida atu serve povu, hodi alkansa sira nia esperansas kona-ba nasaun ida ke di’ak liu, atu garante katak boa governasaun no governasaun ida ne’ebé iha sensibilidade no laran moos ba povu bele hamriik metin iha Timór-Leste; no, sai hanesan buat ne’ebé ita prova ona iha 2009.”

“Liuhusi sira nia matan, fuan, hanoin no asaun loroloron nian maka sira hatudu Timór-Leste nia susesus iha tinan2009, i ita hakarak ida ne’e bele akontese mós iha tinan 2010”.

Primeiru-Ministru, Sua Exelênsia Xanana Gusmão kona-ba ba mensajem anual boas festas, dehan “Ita kompleta ona tinan sanulu ba konsulta popular iha loron 20 fulan Agostu tinan 1999. Ita sei tama ba tinan 2010 ho ona hanoin katak sei hahú ho dezafio bo’ot tanba ita nia povu hakarak halo sira nia mehi sai nu’udar realidade.”

“Hanesan ita nia povu konsege ona hametin libertasaun nasionál iha tinan sanulu liu ba, iha tinan sanulu tuir mai, sei sai nu’udar batalla bo’ot ba ita nia rain. Maibé batalla bo’ot ne’e sei to’o ba nia rohan bainhira ita hatene atu simu duni valor paz no harmonia nasionál.”

“No ita sei hetan; tanba ita hatene hala’o prosesu dezenvolvimentu nasionál ho baze ba elementu fundamentál tolu: Diálogu, Konfiansa no Vizaun Paz no Dezenvolvimentu nian.”

“Ita tenki hahú ho tinan foun ho hanoin ida mós katak, susesu nasionál sei iha nia sentidu, bainhira ita hatene fó prioridade ba partisipasaun konstrutiva ema hotu nian.”

“Boas Festas Santu Natal, ho votus atu Ita nia Família Bo’ot Timor oan tomak bele hetan isin diak, Paz, Domin no prosperidade iha tinan foun.”