Sorumutuk Konsellu Ministrus nian iha loron 21 fulan-fevereiru tinan 2018
Prezidénsia Konsellu Ministrus
VII Governu Konstitusionál
..............................................................................................................................
Komunikadu Imprensa
Sorumutuk Konsellu Ministrus nian iha loron 21 fulan-fevereiru tinan 2018
Governu hala’o sorumutuk iha Palásiu Governu, iha Dili, no analiza ona relatóriu kona-ba levantementu risku sira husi importasaun produtu manu husi Indonézia, ne’ebé aprezenta husi Ministru Estadu Agrilkultura no Peskas, Estanislau da Silva. Relatóriu ida-ne’e halo hafoin haree tiha ba nesesidade atu avalia hikas fali kona-ba proibisaun, ne’ebé dekreta ona iha tinan 2008 liuhusi Despaxu Konjuntu Ministériu Defeza, Finansas no Ministériu Agrikultura no Peskas nian, ba importasaun manu hakiak, manu-inan no produtu manu nian sira seluk ne’ebé seidauk prosesa ne’ebé maihusi nasaun sira iha ne’ebé deteta moras endémiku Gripe Manu sira nian to’o hetan prova ne’ebé loloos katak moras sira ne’e la iha duni ona.
Vise-Ministru Dezenvolvimentu ba Transportes no Komunikasoins, Inácio Moreira, aprezenta projetu investimentu privadu nian ba instalasaun fiu-tasi okos fibra ótika nian husi Atambua mai Dili no husi Alor mai Dili, ne’ebé buka atu promove asesu no fornesimentu ba servisu internét banda larga iha munisípiu sira hotu, inklui Oekusi Ambenu, hanesan pasu importante ida ba dezenvolvimentu sósiu-ekonómiku Timor-Leste nian.
Ikusliu, Konsellu-Ministru analiza ona proposta Rezolusaun Governu nian kona-ba Reforsu Koordenasaun no Rekursu iha Prosesu Adezaun ba ASEAN ne’ebé aprezenta husi Ministru Negósius Estranjeirus no Kooperasaun, Aurélio Guterres. Haree ba importásia ne’ebé Governu Konstitusionál da-VII fó ba adezaun ba Asosiasaun Nasoins Sudeste Aziátiku nian, rezolusaun ida ne’e buka atu asegura la’ós de’it meiu finanseiru sira ne’ebé iha hanesan meiu hirak ne’ebé importante tebtebes, maibé mós koordenasaun integrada husi interveniente governamentál sira oioin iha prosesu ne’e, liuliu liuhusi harii Komisaun Interministeriál ida ba ASEAN, MNEK maka sei koordena no kompostu husi altu funsionáriu sira husi entidade governamentál no instituisaun públika sira hotu ne’ebé relevante, ne’ebé sei lidera husi Ministru Estadu Konselleiru ba Seguransa Nasionál, José Ramos Horta. REMATA
