Pedidu sira kona-ba Auditoria ba Kámara Kontas TSAFK nian
Prezidénsia Konsellu Ministrus
VII Governu Konstitusionál
..............................................................................................................................
Dili, loron 21 fevereiru tinan 2018
Komunicadu Imprensa
Pedidu sira kona-ba Auditoria ba Kámara Kontas TSAFK nian
Iha segunda-feira ne’e, loron 20 fulan-fevereiru tinan 2018, Primeiru-Ministru, Marí Alkatiri, formaliza ona pedidu kona-ba auditoria ba operasaun jestaun finanseira no konta nian hotu-hotu husi Tezouru, Ministériu Obras Públikas, Transportes no Komunikasoins, ADN, Fundu Infraestrutura no Ministériu Turizmu, ne’ebé maka kobre períodu korrespondente ba lejizlatura ikus, i.e., husi loron 9 fulan-agostu tinan 2012 to’o loron 14 fulan-setembru tinan 2017.
Pedidu ne’e mai hafoin solisitasaun atu hala’o auditoria daruak ba operasaun jestaun finanseira no konta nian hotu-hotu husi Autoridade Rejiaun Administrativa Espesiál Oekusi Ambenu (ARAEOA), ne’ebé kobre períodu tinan 2016 to’o agora, ne’ebé haruka ona iha loron 6 fulan-fevereiru liubá.
Iha karta ne’ebé maka dirije ba Prezidente Tribunál Rekursu no Tribunál Superiór Administrativu, Fiskál no Kontas, Juíz Deolindo dos Santos, Primeiru-Ministru justifika kona-ba pedidu auditoria nian hodi deklara katak “jestaun país nian tenke regula, iha momentu hotu-hotu, husi prinsípiu rigór, tranparénsia no responsabilizasaun nian. Lahó exesaun. Tanba ne’e, presiza duni atu garante transparénsia iha Administrasaun Públika, hodi promove kultura rigór no responsabilizasaun nian ida iha jestaun kona-ba rekursu finanseiru sira Estadu nian.” REMATA
