Primeiru-Ministru, Marí Alkatiri, iha segunda, loron 12 fulan-fevereiru, partisipa iha Palestra ho tema “Sidadaun Responsavel” ne’ebé hala’o iha Universidade Nasionál Timor-Lorosa’e (UNTL), iha Dili.

Eventu ne’e hanesan parte ida husi atividade lubuk ida ne’ebé UNTL organiza husi loron 12 to’o 17 fulan-fevereiru, iha biban abertura tinan letivu 2018 universidade públika Timor ne’e nian.

Reitór UNTL, Francisco Miguel Martins, hateten iha ninia diskursu maklokek eventu ne’e nian katak “reflete kona-ba ita-nia responsabilidade nu’udar sidadaun, hanesan mós reflete kona-ba responsabilidade husi sosiedade iha ne’ebé ita halo parte ba, no mós husi instituisaun públika sira ne’ebé serbisu ba ita-nia moris-di’ak no ita-nia dezenvolvimentu”, hodi hatudu momoos knaar ne’ebé UNTL, nu’udar universidade públika Timor-Leste nian mesak ida de’it, dezempeña iha Timor-Leste, iha ne’ebé “50% husi populasaun ho idade kuran husi 19”. Reitór UNTL ne’e mós afirma katak instituisaun ne’e“, tenke iha konxiénsia kona-ba ninia responsabilidade sosiál hanesan forsa motrís husi kapitál umanu ne’ebé importante ba dezenvolvimentu sustentavel no autónomu país nian, iha kuadru ne’ebé Planu Estratéjiku Dezenvolvimentu Timor-Leste no  Objetivu sira husi Dezenvolvimentu Sustentavel Nasoins Unidas nian trasa ona“.

Francisco Miguel Martins, ko’alia liután katak Marí Alkatiri “sai ona hanesan promotór boot ida Universidade ne’e nian, husi kedas ninia kriasaun iha tinan 2000, no dezempeña ona knaar fundamentál iha abertura fakuldade Medisina no Siénsia Saúde, no mós Fakuldade Direitu, durante ninia mandatu hanesan Primeiru-Ministru Governu Konstitusionál I nian”.

Primeiru-Ministru iha nia intervensaun hatete katak “bainhira ko’alia kona-ba sidadania tenke hahú beibeik husi hanoin ida-ne’e hotu tuir lójika ida iha ne’ebé sidadaun di’ak maka sidadaun ida ne’ebé responsavel ba ema hotu nia di’ak, ne’e signifika katak tenke halo liliu maka defende, proteje no konserva ema hotu nia di’ak” no iha “relasionamentu ho sidadaun sira seluk, ne’ebé tranzmite ninia kualidade nu’udar sidadaun ne’ebé responsavel liuliu maka kualidade étika husi ninia hahalok sira”, no hatutan katak “ sidadaun ne’e bé de’it maka responsavel tenke koñese ninia direitu no devér sira, no hatene ninia devér sira ba ema seluk no ba Estadu”, haree liuliu kona-ba papél husi universidade sira no husi eskola hotu-hotu iha konstrusaun sidadania.

Xefe Ezekutivu ne’e afirma mós katak “sidadania iha Estadu Direitu Demokrátiku ida ne’ebé iha partidu barak (multipartidáriu) implika polítiku sira tenke iha komportamentu étiku, ne’ebé mak iha períodu eleisaun nian ida signifika katak ema hotu tenke mobiliza no organiza populasaun sira atu respeita sira-nia direitu rasik, maibé ezerse mós sira-nia direitu atu ba vota hanesan obrigasaun étika ida ba ninia an rasik no ba populasaun tomak”.

Marí Alkatiri remata nia intervensaun hodi halo referénsia ba “kestaun ne’ebé kompleksu kona-ba interasaun kulturál ne’ebé prodús ona timoroan foun ida ne’ebé hakarak iha identidade rasik, ne’ebé liga ba tradisaun sira, maibé akompaña evolusaun siénsia no téknika nian, ne’ebé la nega nia an rasik no la nega buat hirak ne’ebé maka sai hanesan valór universál”, no deklara katak “atu sai sidadaun ida ne’ebé iha responsabilidade loloos, tenke iha responsabiidade ba nia an rasik, ba ninia komunidade, ba nasaun no ba mundu”.

Palestra ne’e konta ho partisipasaun husi estudante UNTL nian sira, ho prezensa husi membru Governu sira, nune’e mós akadémiku nasionál no internasionál sira.