Deklarasaun Porta-vóz IV Governu Konstitusionál,

Sekretáriu Estadu Konselhu Ministrus

Díli, 5 Outubru 2009

Reportajens seluktán ne’ebé la loos kona-ba alegasoens korrupsaun

 

Jornalista ida ne’ebé tekitekir husik hela ABC depoisde halo reportajens balu ne’ebé kestionáveis ka ladún klaru, mosu fali ona, maibé ne’e la’ós surpreza, hanesan funsionáriu jornál austrália nian.

Artigu ikus liu nian husi Steve Holland, ne’ebé publika iha 30 Setembru 2009 ho títulu “Vise Primeiru-Ministru Timór-Leste nian suspeitu halo korrupsaun”, dala ida tan hatudu katak falta investigasaun no detalhes, reflete liu mak istória ka lia-kontadu ne’ebé bazeia ba propaganda FRETILIN nian.

Holland haluha tiha atu hatama faktu katak Sua Exelênsia Vise Primeiru-Ministru José Luís Guterres uluk hanesan Embaixadór iha Nasoens Unidas no Embaixador iha Estadus Unidus Amérika, i bolu nia mai Timór-Leste iha altura ida ne’ebé problemátika liu tanba krize 2006, atu sai Ministru Negósius Estranjeirus no Kooperasaun, tanba Sua Exelênsia Primeiru-Ministru II Governu Konstitusionál, Dr. José Ramos-Horta, no Vise-Primeiru-Ministru Estanislau da Silva mak konvida rasik. Sua Exelênsia Dr. José Ramos-Horta oras ne’e hanesan Prezidente Repúblika Timór-Leste nian, enkuantu Sua Exelênsia Estanislau da Silva hanesan deputadu partidu opozisaun FRETILIN.

Nomeasaun Ana Maria Valério hanesan Asesora/Konselheira ba Misaun Permanente Timór-Leste nian iha Nasoens Unidas ne’e proposta husi Sekretáriu-Jerál Ministériu Negósius Estranjeirus no Kooperasaun uluk liu nian, nu’udár funsionáriu públiku graduadu ka aas liu iha Ministériu laran, i tempu ne’ebá Ministru-adjuntu Negósius Estranjeirus mós simu kedas. Nomeasaun ne’e halo tuir normas ne’ebé vigora ba funsaun públika.

Ana Maria Valério ajuda Misaun Permanente Timór-Leste iha Nasoens Unidas dezde 2003, sempre ke presiza, ho baze pró bono. Nomeasaun halo bazeia ba méritu no ho karáter temporáriu ka ba tempu badak.

Ana Maria Valério hasai lisensiatura iha Estudus kona-ba Feto no Jéneru husi Universidade Kabu Osidentál, iha Áfrika Sul, hetan mós Mestradu iha Globalizasaun no Movimentus Sosiais husi Universidade St. John’s de Queens, Nova Iorke. Iha altura nomeasaun nia hasai hela doutoramentu iha Eskola Foun Investigasaun Sosiál iha Nova Iorke.

Desizaun atu nomeia Ana Maria Valério foti iha tempu Governu ida uluk FRETILIN nian, bainhira FRETILIN sei kaer maioria absoluta iha Parlamentu, ne’ebé sira mak iha podér no autoridade.

FRETILIN foin foti alegasoens kona-ba korrupsaun depoisde José Luís Guterres sai Vise Primeiru-Ministru iha IV Governu Konstitusionál, ne’ebé Primeiru-Ministru Xanana Gusmão mak lidera.

Primeiru-Ministru José Luís Guterres nunka envolve iha naran atu ka atus korrupsaun ida, i dehan katak nia envolvidu iha atividade halo krime ne’e difamasaun ida ke boot tebes.

“Istória ka lia kontadu hanesan ne’e la’ós buat foun ida nein iha méritu uitoan” haklaken Ágio Pereira, Sekretáriu Estadu Konselhu Ministrus no Porta-Vóz Ofisiál IV Governu Konstitusionál nian. ‘Vise Primeiru-Ministru Guterres la iha dúvidas katak nia mós konsideradu hanesan membru Governu nian ida ne’ebé konseituadu ho respeitadu liuhotu, iha nasaun laran no iha rai li’ur. Vise Primeiru-Ministru Guterres hatudu ona katak nia serve duni Paíz no Povu ho laran moos i seidauk halo sala ka buat aat ruma ne’ebé ema bele hatudu liman bá.”

Vise Primeiru-Ministru Guterres uluk hanesan Embaixadór Timór-Leste iha Angola, Mosambike no Nasoens Unidas. To’o tempu independênsia iha 2002 nomeia nia hanesan Vise-Ministru Negósius Estranjeirus no Kooperasaun, i tuir mai sai hanesan primeiru Embaixadór Timór-Leste nian ba Estadus Unidus Amérika, no mós ba Nasoens Unidas. Nia mak Ministru Negósius Estranjeirus durante Governu FRETILIN nian agora Vise Primeiru-Ministru Governu Gusmão nian.