Deklarasaun Porta-vóz IV Governu Konstitusionál iha 12 Outubru 2009
Deklarasaun husi Porta-vóz ba IV Governu Konstitusional,
Sekretariu Estadu ba Konsellu Ministru
Díli- Outubru 12, 2009
Governu simu Votu Konfiansa
Horseik, marka era foun ba sistema demokrásia iha joven Nasaun-Estadu Timor-Leste ne’ebé halo ona tinan hitu.
Primeiru-Ministru, Kay Rala Xanana Gusmão, dala ida tan hatudu nia komprimisu ba lideransa nasional hodi iha vontade ba ko’alia iha tempu besik oras sanulu nia laran hodi halo detabe ida ne’ebé franku no abertu, hodi hatan ba Mosaun Sensura ne’ebé Fretilin mak introduz.
Debate ida ne’e hetan transmisaun direktu liu husi televizaun no radiu, hodi hato’o ba Nasaun tomak no to’o mos iha Indonézia. Primeiru-Ministru ho pasiénsia rona kritika no pedidu esplikasaun sira ne’e, no to’o nia vez, hatan ho informasaun barak tuir tempu ne’ebé Parlamentu autoriza.
Primeiru-Ministru reitira faktu katak debate públiku, mak hanesan prosesu transparente no abertu, hodi sai hanesan sinal ida ba prosesu makaas ba nasaun ne’e. Durante tempu Governu anterior, susar tebetebes atu haree Primeiru-Ministru anterior no Membru Governu hodi hatan pergunta tuir tempu rotina, sira prefere uza deit maioria Parlamentar ba oho movimentu sensura ruma mak tenta atu hamate Governu Alkatiri.
Primeiru-Ministru mos fo hanoin fila fali Opozisaun katak maibé relatóriu husi Komisaun Akollamentu, Verdade no Rekonsiliasaun (CAVR) “Chega!” ne’ebé refere ba Parlamentu Nasional iha Novembru 2005, la iha inisiativa ruma atu lori debate no implementa rekomendasaun husi Governu anterior.
Ba primeira vez, Xanana Gusmão fo istória ba prosesu konsultativu iha kazu Bere ne’ebé inklui soberania boot tolu Estadu nian; Prezidente Repúblika, Prezidente interina Tribunal Rekursu (Natercia Gusmão), Prokuradoria-Jeral Públiku no lider opozisaun, Sr. Mari Alkatiri.
Gusmão dehan katak sensura públika hanesan “oportunismu polítiku” iha asuntu mak sensitivu-liu ba Timoroan sira, “oportunismu polítiku hanesan talvez tentasaun boot ida iha polítika hotu: susar tebetebes atu luta kontra tedensia ida mak inerente ba mane, liu-liu ba nia pekenez no nia frajilidade perante ideias no polítika ne’ebé makaas-liu no preparadu tebetebes.”
Primeiru-Ministru Xanana Gusmão fó ba Nasaun nia vizaun ba futuru ho abordajen ida ne’ebé onestu no klaru – ho polítika ida bazeia ba interese nasional fundamental ne’ebé reflete iha Povu nia fuan no hanoin.
Primeiru-Ministru, Xanana Gusmão, dala ida tan, prova nia komprimisu ba nia Povu no nia Nasaun. Debate públiku serve ba harii konfiansa iha IV Governu Konstituisional no to’o iha ikus, Governu Gusmão simu tulun retumbante husi Parlamentu Nasional.
