Primeiru-Ministru, Mari Alkatiri, inaugura ona sistema abastesimentu bee nian ne’ebé sei fornese bee mós iha oras 24 nia laran kada loron ba família hamutuk 1570 iha Pante Makasar, iha loron 28 fulan-janeiru, iha Oekusi Ambenu.
Projetu ida-ne’e maihusi akordu parseria nian ida ne’ebé Governu Timor-Leste halo ona ho Asian Development Bank (ADB) ne’ebé asina ona iha loron 28 fulan-outubru tinan 2011. Konstrusaun sistema abastesimentu bee nian ne’e hahú ona iha tinan rua liubá, iha fulan-setembru tinan 2015, ho orsamentu totál USD 4,691,852.68 (ADB USD $2,955,86.19 no Governu Timor-Leste nian USD$1,735,985.49).
Primeiru-Ministru, iha ninia intervensaun durante serimónia inaugurasaun nian ne’e, ko’alia liu kona-ba nesesidade atu sensibiliza populasaun atu oinsá konsumu bee ho efisiénsia, hodi dehan katak “Governu atuál estabelese iha ninia Programa hanesan prioridade ida entre prioridade sira seluk kumprimentu ba Planu Dezenvolvimentu Estratéjiku Timor-Leste (tinan 2011-2030) nian ne’ebé ninia objetivu maka lori bee kanalizada ba timoroan sira hotu nia uma hotu iha teritóriu nasionál tomak”.
Prezidente Substitutu Autoridade Rejiaun Administrativa Espesiál Oekusi Ambenu (RAEOA) nian, Arsénio Bano, durante ninia intervensaun hateten katak “asesu ba rede públika bee moos nian sei fó ba populasaun Pante Makasar melloria boot ida iha kualidade moris nian, la’ós de’it promove saúde públika, maibé mós atu halo dezenvolvimentu ekonómiku rejiaun nian.
Aleinde Primeiru-Ministru no Prezidente Subtitutu Autoridade Rejiaun Administrativa Espesiál Oekusi no Ambenu (RAEOA) nian, partisipa mós iha inaugurasaun sistema abastesimentu bee nian ne’e maka, Ministru iha Prezedénsia Konsellu Ministrus, Adriano do Nascimento, Ministru-Adjuntu Primeiru-Ministru nian ba Asuntu Governasaun, José Maria dos Reis, Ministru Administrasaun Estatál, Valentim Ximenes, Vise-Ministru Administrasaun Estatál, José Anuno, Vise-Ministra Planu no Finansas, Sara Lobo Brites, Sekretáriu Estadu Konsellu Ministrus no Komunikasaun Sosiál, Matias Freitas Boavida, Diretór-Jerál Bee no Saneamentu, Gregório de Araújo, Diretór ADB nian iha Timor-Leste, Paolo Spantigati, no reprezentante sira husi sosiedade sivíl no Igreja.
