Primeiru-Ministru, Mari Alkatiri, iha loron 24 fulan-janeiru tinan 2018, partisipa iha sorumutuk Konsellu Estadu nian, ne’ebé prezide husi Prezidente Repúblika, Francisco Guterres Lú Olo, ho objetivu atu debate kona-ba opsaun konstitusionál sira hodi rezolve impase polítiku atuál. Hanesan órgaun konsulta polítika Prezidente Repúblika nian, kompete ba Konsellu Estadu hodi pronunsia kona-ba matéria sira ne’ebé iha importánsia boot liu, hanesan disolusaun Parlamentu Nasionál ka demisaun Governu, tuir prevee ona iha Konstituisaun Nasionál.

Aleinde Prezidente Repúblika no Primeiru-Ministru Governu Konstitusionál VII, partisipa mós iha sorumutuk Konsellu Estadu nian ne’e maka Prezidente Parlamentu Nasionál, Aniceto Guterres Lopes, eis-Prezidente Repúblika Taur Matan Ruak, membru na’in lima ne’ebé hatudu husi Parlamentu Nasionál, José Marcelino Cabral Belo, Aurora Ximenes, Virgílio da Costa Hornai, Virgílio Smith, José dos Santos “Naimori Bukar”, no membru na’in lima ne’ebé Prezidente Repúblika hili, Óscar Lima, Faustinho Godinho Gonçalves da Costa, Alcino de Araújo Baris, Maria Dadi Soares Magno no Laura Soares Abrantes. Antigu Prezidente Repúblika Xanana Gusmão no José Ramos-Horta la marka prezensa iha sorumutuk ne’e tanba  iha hela rai-li’ur hala’o misaun Estadu nian.

Primeiru-Ministru hasoru malu tiha ona ho Prezidente Repúblika, iha loron ida uluk, loron-tersa, iha ámbitu prosesu konsultasaun ho partidu polítiku sira ne’ebé iha asentu parlamentár.

Prezidente Repúblika sei fó-sai ba publiku ninia desizaun kona-ba situasaun polítika nasionál iha eventu ida ne’ebé sei hala’o iha Palásiu Prezidensiál Nicolau Lobato iha sesta, loron 26 fulan-janeiru. iha tuku 10:00 dadeer.