Governu hala’o sorumutuk ida hodi halo diálogu ho komunidade Ermera, iha loron 12 fulan-Janeiru tinan 2018, iha Salaun Parokiál Glenu, Ermera.

Durante diálogu ho komunidade ne’e, membru Governu sira ne’ebé lidera husi Primeiru Ministru, Mari Alkatiri, esplika ba populasaun Ermera kona-ba programa Governu nian no rona, liuhusi reprezentante komunide sira nian, hanoin, preokupasaun no aspirasaun populasaun nian ba dezenvolvimentu Timor-Leste nian.

Partispa iha atividade ne’ebé organiza hamutuk ho Autoridade Munisipál Ermera nian ne’e maka, Ministru Estadu no Ministru Rekursus Minerais, Mariano Assanami Sabino, Ministru-Adjuntu Primeiru-Ministru nian ba Asuntu Governasaun, José Maria dos Reis, Vise-Ministru Edukasaun, José Neves, Sekretáriu Estadu Desportu no Promosaun Alta Kompetisaun, Osório Florindo da Conceição Costa no Sekretáriu Estadu Konsellu Ministrus no Komunikasaun Sosiál, Matias Boavida.

Iha enkontru ne’e marka mós prezensa xefe suku 52 Munisípiu Ermera nian, reprezentante komunidade nian, organizasaun sosiedade sivíl sira, igreja, partidu polítiku no CCI-TL Ermera nian. 

Hafoin diálogu ho Komunidade Ermera nian, Primeiru-Ministru hala’o vizita ba projetu Governu nian balu ne’ebé seidauk remata hanesan konstrusaun Estádiu Glenu no ponte ida no Edifísiu Institutu Kafé Timor-Leste nian.