Deklarasaun Porta-vóz IV Governu Konstitusionál iha 3 Dezembru 2009
Sekretáriu Estadu Konselhu Ministrus
i Portavoz Oficiál Governu Timor-Leste
Díli, 3 Dezembru 2009
Karta proposta kandidatu ba lidera Komisaun Anti-Korrupsaun entrega ona ba Parlamentu Nasionál
Primeiru Ministru submete tiha ona karta ida ba Parlamentu Nasionál hanesan proposta ida hodi aprezenta Senhor Adérito de Jesus nu’udar kandidatu ba primeiru Komisariu Komisaun Anti-Korrupsaun nian.
Nu’udar ema ida ke respeitavél lós, Senhor Adérito de Jesus mós iha aktus ne’ebé kapás hatudu ninia kualidade i mérito tantu iha áreas akadémiku no servisu profisional nian.
Senhor Adérito de Jesus licensiadu iha área Direito hosi Universidade Satya Wacana iha Indonesia no Majistradu Direito hosi Universidade Nova Yorke. Nia hala’o ona servisu iha ONG’s internasionál no nasionál oin-oin iha Timor-Leste i Indonesia, dosente direito respeitavél ida iha Universidade Nasionál, i konsultor diak ida ba Nasoens Unidas.
Senhor Adérito de Jesus iha koñesimentu kapás sobre mekanismu legal nasaun ne’e nian; hanesan ofisiál eleito iha Asembleia Konstituente Timor-Leste nian iha 2001, nia holaparte importante iha esbosu Konstituisaun Repúblika Demokrátiku Timor-Leste. Agora daudaun Senhor Adérito hala’o hela ninia estudo atu foti PhD iha Centru ba Justisa Internasionál i Governasaun iha Universidade Nasionál Australia.
“Senhor Adérito de Jesus kandidatu diak ida ba posisaun Komisáriu Komisaun Anti-Korrupsaun” Primeiru Ministru Kay Rala Xanana Gusmão kasu lia ne’e. “ Nia ema ida ke ninia integridade ho kualifikasoens profisional laiha duvida, nia sei reprezenta interese bót nasaun ne’e ho povu Timor-Leste nian ho kualidades ne’ebé aas liu.’ Ami husu ba Parlamentu Nasionál konsidera nomeasaun ne’e ho mérito, kualifasoens, kapasidade profisionál no dedikasaun no serví ba ita nia Nasaun."
Tuir lei Komisaun Anti-Korrupsaun nian, Governu aprezenta kandidatu ba Komissáriu ne’ebé Parlamentu Nasionál mak hili. Komissáriu tenke hili hosi maoria Membrus Parlamentu, signifika maizumenus três quartos Parlamentu Nasionál presente.
Kuandu hili, Senhor Adérito de Jesus, sei iha mandatu nu’udar Komissariu hodi hala’o funsoens Komisaun nian, rekruta funsiunariu i nomeia Adjuntus Komissarius tolu hodi ajuda servisus operasionais Komisaun nian.
Komisaun Anti-Korrupsaun orgaun independent ida ne’ebé hato’o relatórius ba Parlamentu Nasionál ho mandatu atu dirije investigasoens ba aktus korrupsaun, orienta kampanhas edukasaun i fó hanoin ba ajensias no departamentus públikus hotu-hotu kona-ba halo nusa atu prevene korrupsaun.
