Sorumutuk Estraordinária Konsellu Ministrus nian iha loron 11 fulan-janeiru tinan 2018
Prezidénsia Konsellu Ministrus
VII Governu Konstitusionál
..............................................................................................................................
Komunikadu Imprensa
Sorumutuk Estraordinária Konsellu Ministrus nian iha loron 11 fulan-janeiru tinan 2018
Governu halibur malu iha Palásiu Governu, iha Dili, atu hala’o Sorumutuk Estraordinária Konsellu Ministrus nian ida tanba pedidu husi Ministru Planu no Finansas nian, Rui Augusto Gomes, atubele diskute kona-ba pontu úniku ida: Rezolusaun Governu nian kona-ba adiamentu pagamentu direitu aduaneiru sira no impozisaun sira seluk kona-ba merkadoria hirak ne’ebé fó ba Estadu no Estadu hetan to’o Orsamentu Jerál Estadu tinan 2018 nian tama iha vigór. Oras ne’e daudaun, iha kontentór sanulu-resin sia (19) ho merkadoria ne’ebé fó ba Estadu no Estadu Timor-Leste hetan durante Governu sira liubá ne’e, liuliu kontentór tolu ne’ebé enxe aimoruk. Kona-ba kontentór tolu ne’e maka tenke hala’o pagamentu direitu aduaneiru sira ne’ebé sei deve hela atu nune’e bele hasai ona husi alfándega. Tanba Orsamentu Jerál Estadu tinan 2018 seidauk hetan aprovasaun husi Parlamentu Nasionál, presiza duni atu aprova adiamentu pagamentu direitu aduaneiru to’o Orsamentu Jerál Estadu nian tuirmai tama iha vigór.
Ho dalan ida-ne’e, Autoridade Aduaneira sei halo kálkulu kona-ba montante sira ne’ebé sei deve hela, hodi informa ba ministériu sira kona-ba dívida ne’ebé tenke selu molok hasai merkadoria sira-ne’e husi alfándega. Adiamentu pagamentu kona-ba direitu aduaneiru sira ne’ebé prevee iha Rezolusaun Governu nian ne’e bele hamosu de’it efeitu to’o loron 30 hafoin Orsamentu Jerál Estadu nian oinmai tama iha vigór, data iha ne’ebé ministériu sira tenke selu ona montante hirak ne’ebé deve hela.
Rezolusaun Governu nian ne’e hetan aprovasaun ho lian ida de’it no tama iha vigór iha loron tuirmai hafoin loron publikasaun. REMATA
