Governu Timor-Leste

Sekretáriu Estadu Konselhu Ministrus i

Portavoz Ofisiál Governu

Díli, Dezembru 2, 2009

Investe iha Joven sira, Asegura Futuru

Tuir estimativas ne’ebe iha populasaun Timor-Leste kúase 50% ho idade tinan 18 mai kraik, fornese oportunidades ba foinsa’e sira sai atensaun boot ba Governu ne’ebé Xanana Gusmão lidera. Kriasaun Sekretáriadu Estadu Juventude i Desportos (SEJD) sai hanesan pasu boot hodi fo resposta ba foinsa’e sira.

Ho visaun ida ke forte atu fo oportunidades ba Joven sira liu atividades desportivas, artístikas, i centru ba buka hatene i formasaun, programa Governu nian halo foinsa’e sira hetan ona sentimentu identidade foun hodi hatama hanoin foun kona-ba servisu hamutuk nian, kompriensaun másima, respeito konsiensia kultuál no fiar-an liu husi inisiativa aprendisajen oin-oin.

Sekretáriu Estadu Juventude i Desportos (SEJD) estabelese no apoia inisiativas barak hosi foinsa’e sira duke Governu seluk, loke mos oportunidades ba foinsa’e sira bele partisipa iha projetus oin-oin iha sub-distritu nomos iha nivel nasionál. In jerál 44 organisasoens simu ona apoio hosi SEJD.

Iha ultimos tinan rua ne’e nian laran, kompleta harii no loke ona tan Centrus haat iha Maliana, Oecusse, Ermera no Manufahi. Totál 58 Kampos bolabasket no bolavolley harii no fahe ona iha distritus 13. Instrumentus músika fahe ona iha distritus Covalima, Bobonaro no Atauro.

Tuir kedas ho lansamentu Desportos Komunitarias iha 2008, Jogos Komunitaria ba foinsa’e sira tinan ne’e hala’o iha sub-distritus 65 iha teritóriu tomak, inklui jogos bolavolley, bolabasket, football no atlétismu.

Halao hela treinamentu iha nivel lokal atu suporta inisitivas sira ne’e hanesan kursu ba Manajementus Projectu no Planu Asaun Annual iha distritu Ermera, Maliana no Dili, hala’o hamutuk ho Departamentu Planeamentu Dezenvolvimentu Komunidade Viktoria nian.

Ekipa Timor-oan sira balun partisipa ona iha eventus internasionál, representa Nasaun ne’e ho susesu diak i sai hanesan “Embaixador” Timor-Leste nian iha liur. Aumenta ba medalhas 14 mak manán hosi atlétiku nasional 117 mak partisipa iha Jogos Arafura ne’ebé hala’o iha Darwin, medalhas 16 manán hosi atlétikus aleijadu sira mak partisiapa iha Olímpiku Special ne’ebé hala’o iha Singapura iha Juñu. Atlétas condekurado sira ne’e mak modelus diak tebes ba sira nia komunidades no juventude hotu-hotu iha Timor-Leste.

Ho estabelesimentu Komisaun Arte Marsial i através ko-operasaun ho Kongresu Silat Timor-Leste hodi estabelese Federasaun Silat Timor-Leste (FESTL), Sekretaria ne’e reduz ona konflitus entre membrus husi artes marsiál oin-oin no conseje canaliza sira nia matenek no enerjia ba aspetus disiplinas desportivas nian. Medidas hirak ne’e maka bele ona hamenus violensia entre juventude iha bairus, iha sub-distritus no iha teritóriu tomak.

Atu enkoraje foinsa’e sira nia opiniaun ho lideransa, Konselhu Nasionál Joventude Timor-Leste hetan ona apoio atu habelar sira nia strutura ba to’o iha nivel sub-distritu. Hala’o ona konferensia ida ho partisipantes 5,200 iha Nasaun ne’e.

Konsulta Nasionál ba Estabelesementu Parlamentu foinsaé nian hala’o iha Dili komesa iha 26 to’o 28 Juñu partisipantes konta ho feto klosan 26 no mane klosan 26 mai hosi distritus 13. Iha 7 Outubru 2009 Governu aprova resulusaun ida atu estabelese Parlamentu Foinsaé nian ho objektivu hasa’e konsiensalisasaun no introduz foinsa’e sira sai demokrátiku no partisipasaun cívika nu’udar cidadaun. Liuhosi inisiativa ida ne’e, sira iha kapasidade atu identifika i kompriende problemas no asuntus mak Nasaun ne’e infrenta no bele kontribui ba edukasaun entre sira iha sira nia komunidades.

SEJD kontinua halo sirkulasaun mensal Jornal Lian Foin sae fahe informasaun kona-ba prosesu dezenvolvimentu nasionál ho distribuisaun 5,000 kopias kada fulan gratuita ba distritus 13, instituisoens governu, universidades, eskolas sekundaria, organisassoens foinsa’e sira, centru treinamentus ho ONGs.

Treinamentu fulan tolu ba Jornalismu Básiku, kooperasaun ho Institutu Jornalísta kompleta ho foinsa’e nain 35 atu enkoraja i fahe matenek ba harii jornalistas iha Timor-Leste para sira bele haklen lian ba foinsa’e Timor-oan sira no expresa sira nia preokupasoens ho aspirasoens.

Portavoz IV Governu Konstituisionál, Ágio Pereira dehan “Juventude Timor-Leste mak esperansa ba Nasaun nia futuru. Importansia ba envolve no fó inspirasaun ba foinsa’e sira iha situasaun post konflitu ne’e importante tebes. Governu ne’ebé Xanana Gusmão lidera kompremitidu atu explora no estabelese projektus kreativus no programas atu motiva ita nia foinsa’e, ajuda sira hodi sai feto klosan no mane klosan sira ho hanoin livre. Ita kongratula sira hotu-hotu ba sira nia kontribuisaun to’o agora. Iha ita nia esforsus tomak ita lahaluha ita nia objektivu: katak ema foinsa’e sira ne’e, barak hosi sira ne’e hala’o kna’ar importante tebes iha luta ba ita nia libertasaun nasionál, la’os deit iha oportunidade atu goza rezultadus independensia, paz no prosperidade, maibe prepara mós sira ho diak atu simu responsabilidades ita nia nasaun nia futuru.”

Orsamentu 2010 aloka ba Sekretáriadu Estadu Juventude i Desporto sei fasilita projektus ba juventude iha teritóriu tomak.