Sorumutuk Konsellu Ministrus nian iha loron 15 fulan-novembru tinan 2017
Prezidénsia Konsellu Ministrus
VII Governu Konstitusionál
..............................................................................................................................
Komunikadu Imprensa
Sorumutuk Konsellu Ministrus nian iha loron 15 fulan-novembru tinan 2017
Governu hala’o sorumutuk iha Palásiu Governu, iha Dili, no aprova ona proposta rua husi Ministru Finansas, Rui Gomes, atu valoriza no rekompensa rekursu umanu sira Estadu nian. Proposta ida ko’alia kona-ba pagamentu estraordiáriu saláriu baze fulan-ida nian ba setόr públiku; no proposta ida seluk kona-ba pagamentu suplementár ba funsionáriu sira ne’ebé hala’o serbisu ba prosesu Orsamentu Retifikativu tinan 2017 no taka kontas Estadu tinan 2017 nian.
Komisaun Nasionál Aprovizionamentu, ne’ebé tutela husi Primeiru-Ministru, Marí Alkatiri, aprezenta ona rezultadu konkursu internasionál, ne’ebé lansa iha fulan-jullu tinan ida-ne’e, ba adjudikasaun kontratu konstrusaun ba edifísiu foun eskritόriu kuartél-jenerál Polísia Nasionál Timor-Leste (PNTL) nian. Konsellu Ministrus analiza ona rezultadu ne’e no aprova ona atribuisaun projetu ne’e nian. Desizaun ne’e sei fó-sai tuir regra sira husi konkursu ne’e.
Konsellu Ministru analiza ona proposta kona-ba Rejimentu Konsellu Ministrus nian, ne’ebé aprezenta husi Ministru iha Prezidénsia Konsellu Ministrus, Adriano do Nascimento. Diploma ida-ne’e atu hadi’a atuasaun Konsellu Ministrus nian iha matéria lejizlativa, tanba limitasaun testu kona-ba Rezolusaun Governu nian ne’ebé aprova iha tinan 2013. Rejimentu ida ne’ebá nian, importante ba organizasaun no funsionamentu di’ak Konsellu Ministrus nian no atu ba aprovasaun lejizlasaun kompleta no kompriende-belek (kompriensível).
Konsellu Ministrus mós analiza ona proposta husi Primeiru-Ministru kona-ba revizaun ba Rejime Aprovizionamentu nian ne’ebé Governu Konstitusionál VI nian hahú tiha ona, atu fasilita prosesu administrativu kona-ba adjudikasaun obra boot sira Estadu nian. Alterasaun sira, ne’ebé maka grupu traballu estuda hela, ne’ebé maka Governu anteriόr kria, hakarak atu halo aprovizionamentu lais no transparente liután, atubele aselera ezekusaun obra sira ne’ebé maka presiza hetan uluk vistu. Proposta sira ne’e sei submete ba Konsellu Ministrus, iha tempu badak, atubele hetan aprovasaun.
Ministra Solidariedade Sosiál, Florentina Smith, aprezenta ona istoriál ida kona-ba prosesu kriasaun Konsellu Kombatente Libertasaun Nasionál, ne’ebé ninia projetu Dekretu-Lei, aprova dala tolu ona husi Governu (iha tinan 2015, 2016 no iha 2017), Prezidente Repúblika haruka fila fali. Konsellu Ministrus analiza no debate ona kestaun ne’e, atubele hetan solusaun ida ne’ebé fó dalan ba ninia konkretizasaun.
Ministru iha Prezidénsia Konsellu Ministru informa ona mós ba Ezekutivu kona-ba Kestaun sira ne’ebé deputadu sira hato’o ba membru Governu sira, iha sesaun plenária iha loron 2 no 3 fulan-outubru liubá ne’e. REMATA
