………………………………………………………………………………………………………………
Komunikadu Imprensa
Sorumutuk Konsellu Ministrus loron 31 fulan-outubru tinan 2017
Governu hala’o sorumutuk iha loron 31 fulan-outubru, iha Palásiu Governu, iha Dili, hodi halo análize no debate alterasaun sira ba Programa Governu nian. Ne’ebé inklui dadus foun sira ne’ebé haruka husi ministériu sira, bazeia ba Planu Estratéjiku Dezenvolvimentu no Objetivu sira Dezenvolvimentu Sustentavel nian, hodi fó konsisténsia boot no detallu liután ba objetivu sira Governu Konstitusionál VII nian.
Governu mós hahú ona atu analiza versaun preliminár ida husi lei orgánika ida-idak, ne’ebé inklui distribuisaun kompeténsia sira husi Ministériu no Sekretaria Estadu oin-oin.
Ministru Planu no Finansas, Rui Gomes, no ekipa téknika ida-idak, aprezenta serbisu elaborasaun Orsamentu Estadu Retifikativu, ho ajuste hirak ne’ebé maka presiza atu halo adaptasaun ba estrutura foun Governu nian no halo kompromisu sira ne’ebé maka simu ona, hodi asegura mós, kumprimentu objetivu kontensaun despeza sira Ezekutivu nian. Nune’e, Governu deside ona katak Orsamentu Estadu Retifikativu nian sei la aumenta despeza Estadu, tanba ne’e, mantein nafatin tetu orsamentál orijinál. REMATA