Serimónia aprezentasaun filme ho durasaun badak kona-ba feto sira, ne’ebé organiza husi programa Parseria ba Dezenvolvimentu Umanu, hala’o iha loron 23 fulan-outubru, iha sala sinema Platinum Cineplex, iha Dili. Eventu ne’e hanesan parte ida husi selebrasaun ba loron Internasionál Feto Rurál nian, ne’ebé monu iha loron 15 fulan-outubru no serimónia ne’e  hetan partisipasaun no apoiu husi na’i ulun sira no organizasaun oioin.

Pontu aas husi serimónia ne’e mak entrega prémiu ba manán-na’in sira iha konkursu nasionál kona-ba filme ho durasaun badak ne’ebé inspira husi istória reál sira, ne’ebé lansa husi programa PHD iha fulan-marsu tinan ida ne’e.

Ludovino dos Santos, estudante husi Universidade Nasionál Timor-Lorosa’e (UNTL), sai hanesan manán-na’in husi konkursu, nia aprezenta filme ida ne’ebé konta istória kona-ba feto rurál (Zélia dos Santos) ne’ebé ho ninia osan, loke ofisina mekánika ida iha Balibó, Bobonaru.

Prémiu ba manán-na’in daruak nian fó ba Hermenegildo Maia, hanesan mós estudante husi UNTL, ne’ebé konta istória veterana Madalena Bidau Soares “kasian” ne’ebé harii eskola infantíl lima iha Munisípiu Likisá, ho osan ne’ebé nia simu husi ninia pensaun veterana nian.

Manán- na’in datoluk nian, maka filme husi Bernardo Sarmento, estudante finalista husi UNTL, konta kona-ba Nélia Boavida, ne’ebé fó-an hodi apoia ema ho defisiénsia sira iha zona rurál ida.

Prémiu hirak ne’e entrega husi Espoza Prezidente Repúblika, Cidália Nobre Guterres, husi Sekretária Estadu Igualdade Jéneru no Inkluzaun Sosiál nian, Laura Pina Menezes Lopes, Sekretáriu Estadu Juventude no Traballu, Nívio Magalhães, husi Vise-Prezidente Grupu Feto Parlamentár Timor-Leste, Nurima Ribeiro Alkatiri, no husi Embaixadór Austrália iha Timor-Leste, Peter Doyle.

Maizumenus ema na’in 150 maka partisipa iha eventu ne’e, inklui reprezentante feto sira husi komunidade oioin, estudante sira husi kursu Komunikasaun Sosiál UNTL no UNITAL, korpu diplomátiku no parseiru sira dezenvolvimentu nian, sosiedade sivíl no órgaun sira husi komunikasaun sosiál.

Filme ho durasaun badak rua seluk ne’ebé hatudu maka filme Estêvão Tilman nian, estudante husi UNTL, ne’ebé konta istória kona-ba profesora voluntária ida (Hermínia Almeida) husi eskola infantíl Venilale, ne’ebé partisipa iha inisiativa sira lideransa komunitária nian ne’ebé dezenvolve husi eskola no husi komunidade, no filme Egídio Nono, estudante husi Universidade Orientál (UNITAL), ne’ebé konta istória kona-ba foin-sa’e ida (Eufrásia do Rego) ne’ebé haburas atividade desportiva no kulturál sira hodi habelar pás iha ninia komunidade).

Aprezentasaun filme ho durasaun badak ida ne’e hanesan parte ida husi eventu lubun ida ne’ebé organiza husi Komisaun Diretiva ba Komemorasaun Loron Internasionál Feto Rurál, ne’ebé inklui elementu sira husi Sekretaria Estadu Igualdade Jéneru no Inkluzaun Sosiál, husi Rede Feto, husi programa PHD, husi programa Tomak, husi projetu USAID Avansa Agrikultura, husi Feto ONU no husi Programa Alimentár Mundiál.