Deklarasaun Porta-vóz IV Governu Konstitusionál,

Sekretáriu Estadu Konselhu Ministrus

 

Díli, 27 Juñu 2009

Alegasoens kona-ba korrupsaun

Iha 26 Junhu 2009, Australian Broadcast Association (ABC) haktuir istória ka ai-knanoik ida ho títulu “Xanana Gusmão hetan alegasoens kona-ba korrupsaun” ne’ebé fó sai mós ba jornais, televizaun no rádiu, iha Austrália laran tomak no bá to’o iha paízes besik 46, liuhusi nia rede iha Azia Pasífiku.

“Maski tenke agradese tanba ABC hatudu interese atu halo reportajens kona-ba Timór-Leste, maibé ami mós hein katak presiza halo ho kuidadu atu bele garante lia loos kona-ba faktus hodi nune’e labele kahur fali ho informasoens ne’ebé la loos nian,” haklaken Ágio Pereira, Porta-Vóz IV Governu Konstitusionál i Sekretáriu Estadu Konselhu Ministrus nian, hodi hatutan tán katak “ iha buat barak mak ladún loos iha reportajen ne’e, liu-liu wainhira refere ba leis iha Konstituisaun laran ne’ebé parese hakarak kaer hanesan baze ba alegasoens kona-ba korrupsaun ne’e.”

Molok atu tun husi podér ka husik ukun, Fretilin implementa kedas ona Estatutu kona-ba Titulares ba Órgauns Soberania (Lei 07/2007). Lei ida ne’e mak iha diretivas kona-ba intereses komersiais, no buat seluktán.

Konstituisaun Repúblika Demokrátika Timór-Leste nian estabelese katak Órgauns Soberania mak Prezidente Repúblika, Parlamentu Nasionál, Governu no Tribunais. Entidades hirak ne’e no sira nia membrus rasik la konsidera hanesan “ajentes administrativus” ka órgauns públikus”, haré tuir ba Konstituisaun Timór-nian.

Ágio Pereira komenta mós nune’e “ Governu Fretilin mak responsável tanba nia mak implementa leis hirak ne’ebé temi iha leten bá, ne’ebé tuir loloos Fretilin rasik hatene momoos hela katak seidauk iha atu korrupsaun ida, ne’e duni devia transparente ka koalia buat ne’ebé loos ba Australian Broadcast Corporation.”

Durante tempu krize ai-hán iha mundu tomak, IV Governu Konstitusionál halo esforsus maka’as atu bele garante seguransa alimentár ka hahán. Emprezas sanulu resin-neen timór-oan sira nian rasik mak simu kontratus atu importa ka hatama foos mai husi rai li’ur. Hala’o tuir duni diretivas tomak lei aprovizionamentu nian, ne’ebé kontratus só bele halo depois-de komisaun interdepartementál ida halo avaliasaun kona-ba propostas no negosia kona-ba termus. Ne’e knaar ida ke envolve ministérius lubun ida hamutuk.

Alegasoens ka duun ema halo korrupsaun ne’e halo parte kampanha boot no naruk ida husi parte Fretilin atu hafo’er no halakon Governu Xanana Gusmão nia naran, tanba akuzasoens hirak ikus ne’e hamosu lós kedas iha loron ida antes-de loron ne’ebé prevê ona atu halo aprovasaun ba Komisaun Anti-Korrupsaun Xanana Gusmão nian iha plenáriu Parlamentu Nasionál.

Inisiativa Anti-Korrupsaun ne’e, primeira vez mak Governu ida propoin ka estabelese. Ágio Pereira hakotu nia liafuan hodi dehan katak “ ema hakarak nanis duni atu aproveita momentu di’ak ida hodi halo propaganda ba istória ida ne’ebé Fretilin haktuir, maibé ida ne’e sei la satan ami nia dalan atu iha Segunda-feira oin mai bele konkretiza projetu ida ke ami lori kuaze tinan rua atu prepara. Di’ak liu opozisaun konsentra-an ba iha dezenvolvimentu Timór-Leste duke aproveita meius-komunikasaun Asutrália sira nian hodi halo propaganda ba istória ne’ebé mesak falsu.”

Primeiru-Ministru, ne’ebé lidera rasik kampanha atu harí Komisaun Anti-Korrupsaun, reitera katak nia Governu sei apoia no sei nakloke luan ba naran investigasaun ne’ebé hakarak halo kona-ba má administrasaun, konluiu ka korrupsaun.