Governu analiza o Programa
Prezidénsia Konsellu Ministrus
VII Governu Konstitusionál
..............................................................................................................................
Komunikadu Imprensa
Governu analiza Programa
Governu Konstitusionál VII hala’o sorumutuk iha tersa ne’e, loron 26 fulan-setembru, iha Palásiu Nobre Lahane, iha Dili, hodi analiza proposta husi ministériu sira ba Programa Governu nian, ne’ebé sei aprezenta ba Parlamentu Nasionál iha loron sanulu-resin-lima dahuluk fulan-outubru nian.
Programa ne’e, hala’o tuir Planu Estratéjiku Dezenvolvimentu nian no mós kompromisu husi partidu sira ne’ebé forma koligasaun, sei atualiza no reforsa medida no projetu sira ne’ebé la’o hela. Programa ne’e mós sei reflete intensaun Governu nian atu haforsa servisu sira ne’ebé iha ona, atu fó liután efikásia no efisiénsia ba sistema.
Primeiru-Ministru fó instrusaun ba membru Governu sira atu halo planu no projeta polítika no medida sira hodi fó atensaun liu ba interligasaun no ba reforsu área sira hanesan Obras Públikas no Infraestrutura Boot sira; Abitasaun; Ordenamentu Territóriu no Ambiente; no mós Juventude no Traballu.
Ekipa téknika ida, ho elementu sira husi ministériu hotu-hotu, no koordena husi Ministru Prezidénsia Konsellu Ministrus nian, sei garante ligasaun ba projetu no polítika hotu-hotu husi Programa ne’e, no elabora nota esplikativa ida kona-ba proposta Governu nian, atu fasilita apresiasaun husi deputadu sira-nia parte, nune’e mós ba sujestaun sira ne’ebé mak atu aprezenta.
Governu deside ona mós, hodi propoin estensaun ba tinan rua tan, ba kargu xefia sira daudaun ne’e nian iha Falintil – Forsa Defeza Timor-Leste (F-FDTL). REMATA
