Komunikadu Imprensa

Sorumutuk Konsellu Ministrus nian iha loron 29 fulan-agostu tinan 2017

Konsellu Ministrus hala’o sorumutuk iha loron-tersa ne’e, iha Palásiu Governu, iha Dili, no esklarese ba membru Governu sira kona-ba dúvida ne’ebé foti ona relasiona ho ezersísiu podér Governu jestaun ida nian. Liuhusi sirkulár ida, esplika katak podér sira jestaun nian “tenke hala’o ho forma proporsionál, adekuadu no tuir nesesidade nu’udar aktu jestaun nian baibain, atu funsionamentu regulár instituisaun sira nian la’o di’ak nafatin”. Esklarese mós katak, ”hafoin data eleisaun nian to’o data ne’ebé Governu foun simu pose, membru sira Governu Konstituisaun VI nian tenke limita an de’it ba hala’o inisiativa polítika no lejizlativa ne’ebé iha karakter urjente no emerjénsia nian”, atu rezolve  kestaun sira ne’ebé la hein atu mosu, la hanoin atu mosu ka labele adia ba tempu seluk no katak kestaun sira-ne’e iha karakter krítiku ka karakter ameasa nian.

Bazeia ba proposta Ministra Solidaridade Sosiál nian, Konsellu Ministrus aprova ona hodi hanaruk data ikus ba simu inskrisaun ba faze dahuluk rejime kontributivu seguransa sosiál nian, to’o loron 31 fulan-outubru tinan ida-ne’e. Autoriza ona mós realizasaun prosedimentu administrativu no operasionál hotu-hotu ne’ebé garante katak entidade públika no privada hotu kumpre, iha prazu ne’ebé hanesan, inísiu husi aprezentasaun ba deklarasun sira kona-ba remunerasaun no pagamentu kontribuisaun sosiál sira nian.

Konsellu Ministrus analiza ona proposta husi  Prezidente Autoridade Rejiaun Administrativa Espesiál Oekusi Ambenu nian ba nomeasaun Sekretáriu Rejionál Adjuntu rua. Proposta ne’e hato’o bazeia ba nesesidade atu organiza filafali rekursu umanu sira ne’ebé eziste iha Rejiaun ne’e no atu hametin estrutura organizasionál ida ne’ebé adapta ho dezafiu foun sira husi faze daruak dezenvolvimentu no investimentu nian,  ne’ebé hahú. REMATA