Governu Timor-Leste

Deklarasaun Porta-vóz IV Governu Konstitusionál,

Sekretáriu Estadu Konselhu Ministrus

Díli – 6 Julhu 2009

Onestidade

Iha komunikadu imprensa ida ne’ebé Fretilin fó sai iha 2 Julhu 2009, José Teixeira hakerek “Ami (Fretilin) husu atu imi onestus ka koalia lia loos kona-ba ami nia komunikadus (ba imprensa).

Sekretáriu Estadu Konselhu Ministrus no Porta-vóz IV Governu Konstitusionál, Sr. Ágio Pereira, hatán, “Tuir buat ne’ebé ita nia distintu kolega Sr. José Teixeira hateten, ha’u hakarak aproveita biban ida ne’e atu “onestu ka koalia loloos” kona-ba komunikadus imprensa Fretilin nian, maibé uluk nana’in ha’u hanoin katak ita presiza enkuadra ka hatuur komunikadus imprensa hirak ne’e tuir nia kontextu rasik."

“Karik ita ba haré fali komunikadus imprensa Fretilin nian uluk bá, ita bele verifika katak tuir loloos sira akuza ona katak ema hotu halo korrupsaun – hanesan Primeiru-Ministru, Vise-Primeiru-Ministru rua, kuaze Governu tomak ho sira nia famílias, Prezidente Repúblika, asesores, meius komunikasaun sosiál nian no ikus ne’e mós Banku Mindiál, parseirus dezenvolvimentu sira – i ha’u hakfodak liu – tanba nasoens osidentasi balu mós,” haklaken Ágio Pereira.

Iha 2007, iha karta ida ne’ebé haruka ba editór jornál Austrália nian ida, hodi protesta tanba artigu ida ne’ebé Greg Sheridan mak hakerek ho títulu Fretilin seidauk toman ho konseitu kona-ba Demokrasia, José Teixeira hakerek nune’e “Timor-Leste la’ós “projetu” austrália nian” i la presiza atu iha tempu naruk “Austrália mak atu kaer ami hodi hatudu fali dalan” hanesan Greg Sheridan defende, liu-liu wainhira dehan kaer ne’e signifika envolve Autrália iha golpe atu hamonu governu ida ke eleitu domokratikamente, hanesan akontese iha tinan kotuk bá.”

“Tan de’it ita la gosta artigu ida hodi duun Austrália envolve iha golpe, entaun signifika katak agora ita tenke preokupa liután ka, Sr. Teixeira? Karik ita hasoru hela risku invazaun husi potênsia estranjeira balu? Ha’u hanoin Sr. Kevin Rudd ho nia Governu sira iha asuntus ne’ebé importantes liu atu haré, mak asoens manutensaun ba páz”.

“Karik ita la gosta mak artigus hirak ne’ebé la iha signfikadus ka buat seluktán subar metin iha kotuk?” husu Ágio Pereira “Maibé, tanba Fretilin uza daudaun meius komunikasaun sosiál hodi fahe artigus australianus sira nian hanesan rekursus ne’ebé hatudu faktus iha sira nia propaganda rasik, mai ita haré to’ok buat ne’ebé uluk Greg Sheridan hakerek liutiha eleisoens.”

“Fretilin hasoru hela momentu ida ne’ebé atu hanesan ho Hamas nian. Presiza deside uluk lai se nia ne’e hanesan milísia armada ka partidu polítiku ida ke ema respeita i empenhadu duni iha prosesu demokrátiku, i ida ne’e signifika katak tenke simu rezultadus eleitorais maski lakon”.

‘Durante ne’e iha Paíz ida ne’e laran ema idealiza ka hanoin buat ne’ebé absurda ka la loos nian kona-ba Fretilin. Desde uluk kedas Fretilin hanesan movimentu marxista no antidemokrátiku maka’as tebes ida. Nia halo ona sala nu’udar Governu. Nia líderes ka ulun boot sira dehan katak sira la haruka i kondena tan violênsia ne’ebé mosu iha semana ne’e laran. Maibé turbas ka massa ne’ebé halo distúrbius ka rungu-ranga ne’e, mesak apoiantes Fretilin nian i tuir loloos líderes Fretilin nian rasik bele hapara tumultus ka distúrbius hirak ne’e.’

Liutiha tinan ida, iha 6 Fevereiru 2008, deputadu Fretilin no antigu Primeiru-Ministru Estanislau da Silva hasai liafuan sinistras ka todan iha nia deklarasoens ba ABC. “Ami moris iha paíz ida ne’ebé dame, situasaun oras ne’e hakmatek tebes maibé ne’e la’ós tanba Governu maibé tanba Fretilin mak tolera ka husik ida ne’e. Fretilin deside ona atu labele apela ba ema atu halo naran asaun ida ke bele tau iha perigu seguransa ho estabilidade paíz ne’e nian.”

Ágio Pereira hatutan, “Ami hein katak Fretilin bele kontinua hala’o nafatin polítika ida ne’e, maibé liu-liu ami mós sei la haluha haré didi’ak diferensa entre Fretilin uluk nian no Fretilin ida agora, ne’ebé hanesan milagre ida nakfilak-an sai fali hanesan kruzadus verdade katak defende lialoos to’o mate, no nobres kavaleirus orden Alkatiri nian katak defensores gloriozus Alkatiri nian”.

Iha 19 Junhu 2006, Gabinete Primeiru-Mnistru Mari Alkatiri fó sai komunikadu ida ba imprensa husi Governu Fretilin ho títulu “ Arranju foun kona-ba istória kilat, ne’ebé Governu Timór-Leste la simu.” Komunikadu ne’e fó sai hodi hatán hasoru artigus hirak ne’ebé mosu iha meius komunikasaun Austrália nian hodi defende katak fó tiha ona kontratu ida ba Primeiru-Ministru nian maun-alin rasik ida. Komunikadu imprensa ne’e dehan nune’e:

“Dadus konkretu ida ne’ebé aprezenta iha relatórius agora nian iha jornais The Age no Sydney Morning Heral, katak empreza ne’ebé Bader Alkatiri kaer importa ona munisoens ka kilat musan 257.000 iha finál tinan 2004 ba korpu polísia,” liafuan husi Sr. Antoninho Bianco, Ministru Prezidênsia Konselhu Ministrus Timór-Leste nian.

“Maibé reportajens sira haluha dehan katak kompra ka sosa sasán hanesan ne’e halo tuir duni rezultadu konkursu abertu ka públiku ida, ne’ebé konsebe ka prepara ho kontribuisaun husi asesores internasionais sira i hala’o ho forma ida ke transperente tebes,” Ministro Bianco haklaken. “sosa munisoens ka kilat musan ne’e, labele sai fali hanesan baze atu halo alegasaun eskândalu ka naran duun ema iha ha’u nia Governu,”

Bader Alakatiri ne’e Primeiru-Ministru uluk nian, Mari Alkatiri, nia alin rasik. Mari Alkatiri agora hanesan Sekretáriu-Jerál partidu Fretilin.

Primeiru-Ministru Xanana Gusmão husu ba ekipas auditorias internasionais atu “tau ka tuu liman ba kanek tomak ne’ebé iha”.

“Lalika taúk dehan mai ami kona-ba buat ne’ebé la loos”, Primeiru-Ministru Gusmão hateten, “tanba só halo nune’e mak imi bele tulun Governu hasoru dezafiu boot mak reforma ba sistema jestaun finanseira Timór-Leste nian”.

Ágio Pereira hakotu nune’e, ‘Faktus hatudu katak IV Governu Konstitusionál funsiona ho forma demokrátika, hodi halo reforma ba sistemas ne’ebé ladún di’ak ne’ebé Fretilin harí tiha ona hodi servi nia partidu”.

“Primeiru-Ministru Gusmão oras ne’e estabelese daudaun sistemas foun no hetan ona rezultadus. Iha 2008, ita nia rain hetan segundu lugár hanesan Nasaun ida ne’ebé kresimentu ekonómkiu lais liu iha mundu, no iha ambiente ne’ebé pasífiku i estável. Deslokadus internus sira kuaze fila hotu ona ba sira nia hela fatin, konsege selu pensoens ba ema vulneráveis ka kbiit laek sira, ita nia forsa seguransa servisu ho armonia ka hamutuk i rekorde 12.8% kresimentu ekonómiku, bele oferese ba ita nia Nasaun perspetivas boot ba iha ita nia dezenvolvimentu.”

"Primeiru-Ministru Xanana Gusmão hetan ona rezultadus tanba nia Governu servisu maka’as hamutuk ho Prezidente Repúbika, ho Parlamentu Nasionál, ho sektór privadu, ho sektór públiku, ho parseirus dezenvolvimentu, ho ita nia vizinhus jeográfikus no ho Povu Timór-Leste tomak, durante nia mandatu. Susesu Primeiru-Ministru Gusmão nian ida ne’e hanesan teste ka prova konkretu ida, ne’ebé harí duni realidade ida ne’ebé halo ajentes Fretilin nian, hanesan Sr. José Teixeira no Sr. Arsénio Bano, moris iha pezadelus naruk ida laran, katak moris ho laran susar no la hakmatek."