Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Díli, loron 19 fulan-agostu tinan 2017

Governu espresa ninia solidariedade ba España

Hafoin akontesimentu trájiku iha Barcelona no Cambrils (iha rejiaun Kataluña, iha España), iha semana liubá, iha ne’ebé grupu terrorista ida hamate ema 14 no hakanek ema barak, Governu Timor-Leste haruka mensajen solidariedade nian ba Governu no ba povu España.

Primeiru-Ministru, Rui Maria de Araújo, hateten katak “ami-nia fuan hamutuk ho populasaun España no ho sira seluk ne’ebé maihusi nasaun seluk  ne’ebé sai vítima iha atake terivel ida-ne’e”.

Governu aprezenta ninia laran triste ba família no maluk sira husi sira ne’ebé maka ninia moris afetadu lahó dalan justisa nian no haruka mensajen ida ba Liurai España nian, Filipe VI, no ba Prezidente Governu España nian, Mariano Rajoy, hodi hatudu katak Governu mós sente orór ne’e no sente triste ho akontesimentu boot  ida-ne’e.

Governu mós husik hela liafuan rekoñesimentu ida no hahii ba serbisu ne’ebé halo ona husi elementu intervensaun nian husi komunidade autónoma Kataluña no husi forsa seguransa española nian, iha situasaun ne’ebé halo terus no perturba tebetebes ida-ne’e. REMATA