Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 16 fulan-agostu tinan 2017

Lansamentu fatuk dahuluk ba Biblioteka Nasionál Timor-Leste nian

Serimónia lansamentu fatuk dahuluk ba konstrusaun Biblioteka Nasionál Timor-Leste nian hala’o iha loron 16 fulan-agostu tinan 2017. Eventu ida-ne’e, ne’ebé organiza husi Ministériu Turizmu, Artes no Kultura no husi Ministériu Petróleu no Rekursus Minerais, marka momentu importante ida ba istória país nian. Konstrusaun Biblioteka Nasionál ne’e sei remata iha tinan 2019.

Osan ba projetu ne’e, ne’ebé jere husi Sekretaria Estadu Artes no Kultura ne’e, tama iha troka akordu esplorasaun nian ida, husi Eni, ba kampu petrolíferu ida iha Área Konjunta ba Dezenvolvimentu Petrolíferu, iha Tasi Timor nian. Ministru Turizmu, Artes no Kultura, Francisco Kalbuadi Lay, Prezidente Autoridade Nasionál Petróleu no Minerais, Gualdino da Silva, no Sekretária Estadu Artes no Kultura, Isabel de Jesus Ximenes, sei hato’o sira-nia diskursu iha serimónia lansamentu fatuk dahuluk nian ne’e.

Projetu ne’e hahú ona iha tinan barak liubá, ho atividade kapasitasaun ba rekursu umanu sira, planifikasaun ba konstrusaun edifísiu, aprovasaun ba lejizlasaun ne’ebé presiza no kriasaun rejistu bibliográfiku ida. Lei Orgánika Biblioteka Nasionál Timor-Leste nian (Dekretu-Lei n. 21/2016, fulan-juñu nian) define katak instituisaun ne’e ninia misaun mak atu “halo rekolla, tratamentu no konservasaun ba patrimóniu dokumentál timór nian, no mós asegura ninia estudu, divulgasaun no kondisaun sira atu uza patrimóniu dokumentál ne’e no garante klasifikasaun no inventariasaun ba patrimóniu bibliográfiku nasionál.” Lei ida-ne’e harii Diresaun Nasionál haat: Akizisaun, Prosesamentu no Konservasaun; Kolesaun, Asesu no Divulgasaun; no mós Administrasaun Jerál ida no departamentu Sistema Informasaun ida.

Sekretaria Estadu Artes no kultura konta ho pesoál kualifikadu, liuliu iha área estudu biblioteka nian, no asina ona akordu ida ho Biblioteka Nasionál Portugál nian, atubele garante apoiu kontínuu ba konstrusaun biblioteka ne’e nian no formasaun ba funsionáriu sira. Biblioteka ne’e sei iha ligasaun ho biblioteka sira seluk país nian no ho setór edukasionál, atu promove aprendizajen no patrimóniu kulturál.

Portavós Governu nian, Ministru Estadu Agio Pereira, hateten katak “serimónia ida-ne’e nu’udar momentu istóriku ida ba Timor-Leste. Hanesan rezultadu husi serbisu ida ne’ebé di’ak husi Sekretaria Estadu Artes no Kultura, atu garante finansiamentu projetu ne’e nian no preparasaun ba rekursu umanu sira. Biblioteka Nasionál ne’e sei benefisia jerasaun oinmai, hodi asegura konservasaun no manutensaun di’ak kona-ba informasaun, no nu’udar instituisaun ida ne’ebé iha responsabilidade ba prezervasaun patrimóniu kulturál ita-nia pátria nian.”REMATA