Governu hato’o kondolénsia hafoin asidente trájiku

Ho laran triste tebes maka Governu simu notísia kona-ba Aquilino Santos Caeiro, Daniel J.Groshong e Ruth Klaasje ninia mate, hafoin asidente trájiku ida iha estrada iha sábadu liubá.

Lori Governu nia naran, Primeiru-Ministru, Rui Maria de Araújo, hato’o sentida kondolénsia ba família, belun no kolega sira, iha momentu lakon boot ida-ne’e nian.

Aquilino Santos Caeiro, Daniel J.Groshong no Ruth Klaasje serbisu ho dedikasaun, domin no haka’as sira nia an tomak, hodi husik hela kontributu importante ida ba Timor-Leste.

Timoroan Aquilino Santos Caeiro, bainhira sei moris, hala’o knaar hanesan Diretór-Jerál Ministériu Turizmu, Arte no Kultura nian. Daniel J.Groshong, maihusi Oregon, EUA, nu’udar jornalista veteranu ida, fotógrafu profisionál no fundadór Fundasaun Hummingfish. Ruth Klaasje, maihusi Olanda, nu’udar hakerek na’in, espesializada iha Edukasaun.

Portavós Governu nian, Ministru Estadu Agio Pereira, deklara katak “Sira na’in hirak ne’e ida-idak fó ona sira-nia kontributu ba Timor-Leste ho kbiit tomak no laran di’ak. Momentu lakon nian ida-ne’e, ami hato’o ami-nia solidariedade ba sira-nia família, belun no kolega sira, no fó ami-nia omenajen ba sira-nia servisu, ne’ebé sei tutan  nafatin ba jerasaun sira oinmai.” REMATA