Governu Timor-Leste

Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 9 fulan-agostu tinan 2017

Governu apoia Maratona Internasionál Dili no Tour Timor tuirmai

Governu apoia eventu desportivu internasionál prinsipál rua iha Timor-Leste, ne’ebé sei hala’o iha semana oinmai. Maratona Internasionál Dili tinan 2017 ne’e sei hala’o iha loron 19 fulan-agostu, tuir kedas ho Tour Timor tinan 2017 nian, halai taru bisikleta foho nian iha loron balu nia laran, ne’ebé sei hahú iha loron 19 fulan-setembru no sei remata iha loron 23 fulan-setembru.

Sekretáriu Estadu ba Juventude no Desportu, Leovigildo Hornai, konsidera katak “eventu boot rua ne’e promove potensiál turístiku Timor-leste nian iha mundu no kontribui hodi hametin pás no unidade sosiál.

Eventu desportiva rua ne’e organiza husi Timor Nobre, organizasaun ne’ebé dirije husi antigu Prezidente Repúblika timoroan nian no premiadu Nobel Pás nian, José Ramos-Horta, ne’ebé hahú tinan 2009 no 2010, hanesan parte husi ninia kampaña “Dili, Sidade Pás”. Ramos-Horta ko’alia kona-ba potensiál husi prova hirak ne’e atu “hatudu Timor-Leste nia furak naturál, ita-nia povu, hahalok simpátiku no simu ema di’ak”, no hatutan mós katak desportu rekoñesidu hanesan ida husi forma hirak ne’ebé di’ak liu atu “promove pás no halibur ema”.

Hein katak ema na’in 5.000 resin maka bele partisipa iha eventu tolu ne’ebé halo parte ba Maratona Internasionál Dili nian: maratona (42,195 km), meia-maratona (21,0975 km) no halai hamutuk rama-rame, sein intensaun loloos atu buka manán. Kompetisaun rua ne’e sei regulamenta tuir padraun husi maksukat (medidór) abilitadu no husi profisaun kronometrajen nian, iha parte tasi-ibun área sentrál sira Dili nian. Maratona ne’e sei kompleta ho “halai ba Pás” ho distánsia 5 km, ne’ebé sei hetan partisipasaun husi estudante timoroan rihun ba rihun husi ensinu sekundáriu, hamutuk ho sira nia família sira.

Portavós Governu VI, Ministru Estadu Agio Pereira, agradese ba Ramos-Horta no Timor Nobre ba serbisu ne’ebé halo ona iha organizasaun enkontru desportivu importante sira ne’e, ne’ebé “aleinde komponente desportiva, ekonómika no turistíka, kontribui ba mudansa hanoin husi ema rai-li’ur kona-ba ita-nia nasaun no hametin pás, armonia no orgullu nasionál” Lori Governu nia naran, ha’u hato’o boaznvindaz kaloroza ba vizitante estranjeiru sira hotu ne’ebé to’o daudaun ona mai Timor-Leste atu partisipa iha eventu ne’e. REMATA

Informasaun barak liután bele hetan iha www .diliinternationalmarathon.com no www.tourdetimor.com