Iha sesta ida-ne’e, loron 4 fulan-agostu, “Retratu husi mandatu Governu Konstitusionál VI nian” – ne’ebé tau hamutuk hotu serbisu ne’ebé Ezekutivu dezenvolve ona iha setór sosiál, setór ekonómiku, setór infraestrutura no setór governasaun nian, entre setór sira seluk – entre fulan-fevereiru tinan 2015 to’o fulan-agostu tinan 2017, ofisialmente divulga ona, iha serimónia ida ne’ebé hala’o iha Salaun Nobre Ministériu Negósius Estranjeirus no Kooperasaun nian. Iha jestu simbóliku ida, Primeiru-Ministru entrega “Retratu” ne’e ba membru Governu nian sira, ne’ebé entrega ona ba nia relatóriu hirak ne’e, ne’ebé ko’alia kona-ba prosesu governasaun nian husi Ministériu, Sekretaria Estadu, organizmu no entidade hotu-hotu ne’ebé tutela ba Governu ida-ne’e.

Iha ninia aprezentasaun, Primeiru-Ministru, Rui Maria de Araújo, hatete katak serbisu Governu nian nunka bele hotu, sempre presiza kontinuasaun. No, to’o ikus nunka haluha hato’o agradesimentu ba funsionáriu hotu-hotu ba serbisu ne’ebé sira halo ona.

Kompete ba Ministru Koordenadór sira hanesan  Agio Pereira, Estanislau da Silva, António da Conceição e Dionísio Babo no Vise-Ministru Negósius Estranjeirus no Kooperasaun, Roberto Soares, atu halo diskursu iha inísiu serimónia ne’e nian.

Interveniente hotu-hotu ko’alia liu kona-ba knaar ne’ebé sira hala’o ona, hodi buka atu foka liu atividade prinsipál sira no konkista sira Governu ida-ne’e nian. 

Iha momentu oin-oin, hotu-hotu hanoin hikas antigu Ministru Estadu, Koordenadór Asuntus Sosiais no Ministru Edukasaun nian, Fernando La Sama de Araújo, ne’ebé integra de’it ba Governu ida ne’e iha fulan dahuluk sira, tanba mate iha fulan-juñu tinan 2015.

Atu lee komunikadu imprensa portavós nian kona aprezentasaun “Retratu husi mandatu Governu Konstitusionál VI 2015-2017”, klike iha ne’e.

Atu hetan asesu ba livru ne’e, klike iha ne’e.