Governu Timor-Leste

Aprezentasaun kona-ba “Retratu” husi atividade Governu Konstitusionál VI nian

Iha sesta dadeer, loron 4 fulan-agostu, Ministru Estadu ida-ida husi Ministru Estadu na’in haat Governu Konstitusionál VI nian sei aprezenta ba Primeiru-Ministru, Rui Maria de Araújo, relatóriu sira kona-ba Prosesu Governasaun nian husi Ministériu, Sekretaria Estadu, organizmu no entidade sira hotu ne’ebé sira fó tutela; tuir fali, Ministériu sira sei aprezenta sira-nia relatóriu. Serimónia ne’e sei hala’o iha Salaun Nobre Ministériu Negósius Estranjeirus no Kooperasaun.

Inisiativa ida-ne’e adota dahuluk husi Governu Konstitusionál IV, iha tinan 2012, no buka atu asegura tranzisaun ida ho informasaun entre administrasaun sira. Dokumentu sira kona-ba prosesu governasaun husi Governu Konstitusionál VI nian soi informasaun oin-oin kona-ba Ministériu sira, entidade no organizmu autónomu sira, inklui análize ba programa sira no polítika sira ne’ebé ezekuta ona, sínteze husi dezafiu sira ne’ebé hasoru no rekomendasaun ba futuru. Informasaun sira kona-ba projetu sira ne’ebé sei la’o hela buka hamenus interrupsaun sira ne’ebé la presiza ba prosesu sira.

Eventu ne’e konta mós ho lansamentu kona-ba “Retratu husi Mandatu Governu Konstitusionál VI nian [2015-2017]”, publikasaun ne’ebé deskreve atividade prinsipál sira no konkista sira Governu ida-ne’e nian hahú husi tempu simu pose, iha loron 16 fulan-fevereiru tinan 2015. Iha Retratu ne’e temi kona-ba avansu iha setór sosiál, ekonómiku, infraestrutura sira no governasaun nian, no inklui lista ida husi lei hotu-hotu ne’ebé aprova ona. Publika diskursu neen ne’ebé konsidera importante liu iha lejizlatura ne’e no iha seksaun “Hatene katak...”, relatóriu badak sira husi inisiativa sia ne’ebé destakadu liu.

Iha mensajen introdutória livru ne’e nian, Primeiru-Ministru konvida ema hotu atu lee kona-ba “rezultadu hirak prinsipál ne´ebé ita hetan ona durante governasaun Governu Konstitusionál da-VI nian no ida-ne’e fó ba ita orgullu boot tebes”. No hatutan: “Ne’e maka testemuñu kona-ba susesu ne’ebé ita bele hetan bainhira ita servisu ho badinas ‘Ida ba hotu-hotu no hotu-hotu ba ida’, ne´e mak mote ba Governu nian ne’ebé maka ha’u an rasik hetan priviléjiu atu xefia.”

“Retratu” ne’e sei ba públika iha lian Tetun, lian Portugés no lian Inglés no sei distribui ba Prezidente órgaun soberania ida-idak nian, embaixada no konsuladu sira, no ba munisípiu sira iha Timor-Leste. Informasaun adisionál sira, inklui link sira atubele hetan asesu ba livru ne’e husi internet, sei disponivel hafoin lansamentu.

Portavós Governu konstitusionál VI, Ministru Estadu Agio Pereira, hateten katak “aprezentasaun konta sira iha livru ne’e sai hanesan testemuñu maturidade no profisionalizmu husi ita-nia governasaun. Hirak ne’e  sai hanesan prova husi valór boot sira ne’ebé ita atribui ba progresu, ita-nia jornada ba dezenvolvimentu nasionál”. REMATA