Sorumutuk Konsellu Ministrus nian iha loron 11 fulan-jullu tinan 2017
Prezidénsia Konsellu Ministrus
VI Governu Konstitusionál
..............................................................................................................................
Komunikadu Imprensa
Sorumutuk Konsellu Ministrus nian iha loron 11 fulan-jullu tinan 2017
Konsellu Ministrus hala’o sorumutuk iha loron-tersa ne’e, iha Palásiu Governu, iha Dili no aprova ona Rezolusaun Governu nian kona-ba nomeasaun Rosário da Graça Maia ba Prezidente Konsellu Diretivu TATOLI - Ajénsia Notisioza Timor-Leste, IP nian ba tinan haat tuirmai, ne’ebé propoin husi Ministru Estadu Prezidénsia Konsellu Ministrus.
Ministra Turizmu, Arte no Kultura interina aprezenta Developing Brand Tourism Timor-Leste. Ho apoiu husi ONG Asia Foundation nian, promove ona kriasaun imajen marka nian ida husi nasaun ne’e, ba promosaun institusionál iha merkadu internasionál sira.
Hetan ona aprovasaun Rezolusaun Governu nian rua ne’ebé propoin husi Sekretáriu Estadu Juventude no Desportu nian: ida kona-ba Parlamentu Foin-sa’e no ida seluk kona-ba Polítika Nasionál ba Dezenvolvimentu Desportu nian. Hafoin funsiona iha tinan ualu nia laran, Parlamentu Foin-sa’e ne’e konsolida an hanesan instrumentu susesu nian ida. Durante tinan hirak ne’e, halo ona alterasaun balu ne’ebé la temi iha programa orijinál, liuliu aumentu ba númeru foin-sa’e ne’ebé atu tuur iha Parlamentu Foinsa’e sira nian ne’e, atu asegura partisipasaun reprezentante na’in rua husi foin-sa’e ho defisiénsia sira, hanaruk “mandatu” foin-sa’e sira iha Parlamentu ne’e nian ba másimu tinan tolu, atu garante no maksimiza efeitu sira husi programa ne’e no hametin atividade sira iha ámbitu lideransa no empriendedorizmu nian.
Tanba sai hanesan prioridade ida iha Planu Estratéjiku Dezenvolvimentu tinan 2011-2030 nian, Governu deside ona atu adota Politika Nasionál ida ba Dezenvolvimentu Desportu nian. Desizaun ida-ne’e nu’udar kontinuasaun husi iniativa oin-oin ne’ebé maka kontribui ona atu hametin entidade ne’ebé forma Movimentu Desportivu, liuliu Komité Olímpiku, Komité Paralímpiku no Komité Espesiál Olímpiku, Konfederasaun Desportu nian no federasaun sira, asosiasaun no klube ativu sira iha país laran.
Ikus liu, Konsellu-Ministrus aprova Proposta Rezolusaun Parlamentu Nasionál nian ne’ebé aprova Akordu kona-ba Kooperasaun Téknika no Programa Kooperasaun Voluntáriu sira husi Japaun ba Tasi Balu entre Timor-Leste no Japaun. Proposta ne’e aprezenta husi Ministru Negósius Estranjeirus no Kooperasaun, no ninia objetivu maka atu hametin lasu amizade no intensifika. kooperasaun entre país rua ne’e.
Loron 11 fulan-jullu tinan 2017
