Kampaña eleitorál hala’o ho hakmatek no responsável
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 10 fulan-jullu tinan 2017
Kampaña eleitorál hala’o ho hakmatek no responsável
Períodu ofisiál kampaña eleitorál nian ba eleisaun parlamentár tama ona iha semana ikus no Komisaun Nasionál Eleisaun [CNE, sigla iha lian portugés], Sekretariadu Tékniku Administrasaun Eleitorál [STAE], Ministériu Administrasaun Estatál no Ministériu Interiór kontinua serbisu atu garante eleisaun la’o ho hakmatek no tuir orden.
Períodu ofisiál kampaña nian sei hotu iha loron 19 fulan-jullu. Partidu 20 no koligasaun ida sei hadau-malu ba fatin deputadu sira nian hamutuk 65 iha Parlamentu Nasionál. Eleitór sira sei ba fatin urna sira nian iha loron 22 fulan-jullu.
Rejistu ona eleitór sira hamutuk 760.907 no sei prepara fatin votu nian sira hamutuk 1.118, iha sentru sira votu nian hamutuk 843. STAE kria ona mapa online ida atu hatudu fatin husi sentru votu nian sira. Hafoin hetan tiha susesu dahuluk husi programa-pilotu iha eleisaun prezidensiál sira nian, sei loke mós fatin votu nian iha Austrália (Sidney, Melborne no Darwin), Portugál (Lisboa), Koreia Sul (Seul), no Reinu Unidu (Londres).
Observadór eleitorál internasionál akreditadu sira to’o iha Timor-Leste iha númeru ne’ebé signifikativu. Uniaun Europeia harii ona ekipa 13 iha teritóriu nasionál tomak. Iha fulan-maiu, Misaun Observasaun husi UE nian “hasai konkluzaun katak eleisaun sei hala’o ho di’ak no hakmatek, hahii ba autoriedade eleitorál sira tamba oganiza prosesu administradu-di’ak no inkluzivu”
STAE kontinua fó apelu ba eleitór sira ne’ebé rejista ona atu partisipa. Kria ona materiál espesífiku sira hodi informa no insentiva joven, feto no ema defisiente sira.
Portavóz Governu, Ministru Estadu Agio Pereira, observa katak “preparativu sira la’o ho di’ak, no, iha loron votasaun nian, ho dignidade ita sei hala’o ita-nia direitu, manan maski susar, hodi mantein nasaun livre no demokrátiku” REMATA
