Tradeinvest Timor-Leste, organizmu estatál ba promosaun investimentu no esportasaun nian, hala’o forum emprezariál dahuluk iha Darwin, Austrália, iha loron 16 fulan-juñu, ho objetivu atu promove oportunidade investimentu nian sira iha Timor-Leste.

Ministru Estadu, Koordenadór Asuntus Ekonómikus no Ministru Agrikultura no Peskas, Estanislau da Silva, hateten katak “Timor-Leste insentiva daudaun ona dezenvolvimentu negósiu iha setór lima ne’ebé iha potensialidade liu iha nasaun: Mina-rai no Gás, Agrikultura, Peska, Turizmu no Indústria Transformadora”, ba hirak ne’e nia aumenta mós atividade mineira nian. Ikus liu, nia hato’o proposta ida: “Timor-Leste prontu ona atu halo negósiu no komérsiu. Mai iha Timor-Leste no investe ba iha setór sira ne’ebé ita-boot sira mehi.”

Forum ne’e konta mós ho prezensa husi Xefe Governu Teritóriu Norte nian, Michael Gunner, ne’ebé kompremete an ona “atu fó apoiu ba dezenvolvimentu Timor-Leste nian no hametin relasaun entre nasaun rua ne’e”. Na’i-unlun ne’e mós fó hanoin katak Timor-Leste no Austrália la’ós de’it iha relasaun komersiál: sira-nia relasaun istórika proximidade nian hahú kedas husi Funu Mundiál da-2.

Tradeinvest lori emprezáriu timoroan sira ba eventu ida ne’e, atu hakle’an sira-nia koñesimentu kona-ba setór privadu iha Austrália.

Marka mós prezensa iha eventu ne’e Ministra Turizmu, Arte no Kultura Interina Timor-Leste nian Isabel Ximenes, Embaixadór Austrália nian iha Timor-Leste, Peter Doyle, nune’e mós ho emprezáriu timoroan no australianu sira.