Lei Rejime Kontributivu Seguransa Sosiál tama iha vigór iha loron 1 fulan-agostu, ba setór públiku no parte setór privadu. To’o loron 23 fulan-juñu, Ministériu Sosidaridade Sosiál daudaun ne’e hala’o hela asaun esklaresimetu iha territóriu nasionál, hodi esplika ba órgaun soberania sira, servisu públiku (husi administrasaun direta no indireta Estadu nian, servisu no fundu autónomu no empreza públika sira) no setór privadu kona-ba kestaun importante hirak ne’ebé mak envolve iha aplikasaun kona-ba Lei ne’e.

Ekipa sira husi Diresaun Nasionál Rejime Kontributivu Seguransa Sosiál nian dezloka ba Munisípiu sira hotu no ba Rejiaun Administrativa Espesiál Oekusi-Ambenu (RAEOA), ne’ebé prevee ona mós kontaktu sira ho emprezáriu lokál sira (no organizasaun naun-governamentál sira ne’ebé maka husu). 

To’o iha fulan-agostu nia rohan, entidade empregadór públika sira no empreza privada sira hotu hamutuk ho serbisu-na’in 100 resin, tenke halo Adezaun Obrigatória ba Seguransa Sosiál. Iha empreza privada sira ho serbisu-na’in ne’ebé liu husi 100, tenke rejista sira hotu ne’ebé hala’o atividade profesionál hetan renumerasaun, ho kontratu serbisu tuir tempu ne’ebé maka determinadu ka indeterminadu, tuir Lei Serbisu nian. Iha serbisu públiku sira, tenke tau-naran kona-ba sira hotu ne’ebé hala’o funsaun  ne’ebé selu husi Estadu (funsionáriu públiku, ajente, kargu nomeasaun polítika, ne’ebé kontrata iha termu loloos, asesór sira ne’ebé la halo prova sei la-konta iha rejime seluk ne’ebé maka hanesan, nsst.).

Sira mós bele tau naran, iha kazu ida ne’e la obrigatóriu – emprezáriu individuál, serbisu na’in sira ne’ebé privadu, jerente no administradór empreza sira nian no serbisu-na’in doméstiku sira.

Oras ne’e benefisiáriu sira Seguransa Sosiál nian, sei ko’a sira-nia osan, atu iha tempu ne’ebé loos, bele hetan pensaun reforma ida, pensaun invalidez, subsídiu maternidade  no paternidade, no subsídiu mate nian ne’ebé maka sei husik helaba familia sira.