Inaugurasaun Aeroportu Suai nian
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 21 fulan-juñu tinan 2017
Inaugurasaun Aeroportu Suai nian
Inaugurasaun Aeroportu Suai nian, iha loron 20 fulan-juñu, hatudu katak remata ona projetu boot infraestrutura nian ida ne’ebé harii hodi fó apoiu ba dezenvolvimentu nasionál. Aeroportu ne’e horik iha Munisípiu Kovalima nian, besik kilómetru 15 husi sidade Suai, iha ninia pista ida ho naruk metru 1.500 no instalasaun moderna hodi simu pasajeiru sira ho di’ak no fó apoiu ba navegasaun.
Prezidente Repúblika, Francisco Guterres Lú Olo, ko’a fita ofisiál iha inaugurasaun no asina plaka komemorativa Aeroportu Internasionál Komandante Xefe FALINTIL, Kay Rala, Xanana Gusmão. Inaugurasaun ne’e hala’o iha loron moris da-71 Ministru Xanana Gusmão nian, ne’ebé nia hahi’i aeroportu ne’e hanesan projetu notavel ida, ne’ebé sei fó biban ba investimentu no empregu.
Ministru Obras Públikas, Transportes no Komunikasoins, Gastão de Sousa, no Ministru Petróleu no Rekursu Minerais, Alfredo Pires, loke serimónia ofisiál ba inaugurasaun ne’e. Primeiru-Ministru, Rui Maria de Araújo, marka prezensa, hamutuk ho reprezentante Governu nian sira seluk, membru Parlamentu Nasionál, veteranu sira, membru sira husi kleru, dirijente lokál sira nian no ofisiál sira Estadu nian. Aeroportu ne’e hetan bensaun husi Bispu Maliana, Dom Norberto Amaral.
Instalasaun sira ne’e inklui terminál foun ida, torre kontrolu nian, kuartél bombeirus, estasaun meteorolójika no eliportu ho servisu evakuasaun nian ba ambulánsia aérea. Presiza halo luan no hadi’a fila-fali pista tuan Suai nian no harii instalasaun foun no moderna sira ne’ebé define ona iha Planu Estratéjiku Dezenvolvimentu Nasionál tinan 2011-2030.
Aeroportu ne’e fó dalan hodi aumenta komunikasaun nasionál no sei promove dezenvolvimentu iha tasi mane, fó apoiu ba atividade sira ne’ebé relasiona ho mina-rai no minerál, agrikultura, turizmu, saúde no seguransa. Inisiativa ida ne’e hatudu kompromisu Governu nian hodi apoia kreximentu ne’ebé hanesan iha territóriu nasionál Timor-Leste nian.
Portavós Governu nian, Ministru Estadu Agio Pereira, hatete katak “inaugurasaun ba Aeroportu Internasionál Komandante-Xefe FALINTIL Kay Rala Xanana Gusmão nian ne’e husi servisu iha projetu boot ida, ne’ebé harii tuir tempu no ho kualidade. Ami hato’o parabéns ba ministériu sira ne’ebé envolve ona no Timor GAP, ba sira-nia knaar iha projetu ida ne’e. Aeroportu ne’e atu serbí nesesidade imediata sira husi tasi mane hodi fó apoiu ba dezenvolvimentu nasaun nian no importante liu maka realiza potensiál kreximentu rejiaun nian”. REMATA
