Sorumutuk Konsellu Ministrus nian iha loron 30 fulan-maiu tinan 2017
Prezidénsia Konsellu Ministrus
VI Governu Konstitusionál
..............................................................................................................................
Dili, loron 30 fulan-maiu tinan 2017
Sorumutuk konsellu Ministrus nian iha loron 30 fulan-maiu tinan 2017
Konsellu Ministrus hala’o sorumutuk iha loron-tersa ne’e, iha Palásiu Governu, iha Dili, no Rezolusaun Governu nian kona-ba Polítika Nasionál Aviasaun Sivil ne’ebé Ministru Obras Públikas, Transportes no Komunikasoins aprezenta, hetan ona aprovasaun. Governu hakarak katak, iha tinan 2030, país ne’e sei iha setór aviasaun ida ne’ebé seguru, sustentavel no krexente, ne’ebé sei fó kontribuisaun signifikativa ba dezenvolvimentu ekonómiku no sosiál, hodi tulun fó sai imajen positiva Timor-Leste nian iha rai-li’ur.
Hafoin hetan tiha aprovasaun Polítika Nasionál ba Teknolojia Informasaun no Komunikasaun, presiza kria Institutu Teknolojia Informasaun no Komunikasaun. Entidade ida ne’ebé hetan aprovasaun iha sorumutuk Konsellu Ministrus nian, sei sai nu’udar responsavel ba jestaun di’ak kona-ba rede informátika Governu nian no entidade públika sira seluk, hodi permite modernizasaun Estadu nian ida no prestasaun ida ne’ebé di’ak liu husi servisu sira.
Ministru Estadu, Koordenadór Asuntus Ekonómikus no Ministru Agrikultura no Peskas ninia proposta ba Dekretu-Lei kona-ba Sistema garantia kréditu nian ba empreza ki’ik no média sira, hetan ona aprovasaun. Ne’e hanesan prioridade ida ba Governu, tanba hanesan ferramenta ida justisa sosiál nian, maibé mós hanesan komponente fundamentál ida atu forma tesidu emprezariál ida ne’ebé metin no viavel. Ho hakarak atu fasilita asesu kréditu ba sosiedade komersiál sira ne’ebé timoroan iha pelumenus 75% husi partisipasaun sosiál emprezáriu sira nasionál nian no ba emprezáriu individuál sira ne’ebé mak hodi nian naran rasik. Ho mekanizmu ida ne’e, Estadu fahe risku konsesaun kréditu nian ba banku komersiál sira, to’o valór aas liu 70% husi empréstimu ne’ebé fó atu kumpre rekizitu legál sira.
Halo ona mós aprezentasaun preparatória ida kona-ba Polítika Nasionál kona-ba Tasi-boot (Oseanu) sira, molok Konferénsia ne’e “Ita-nia Tasi-boot sira, Ita Nia Futuru: Parseria sira ba Implementasaun Dezenvolvimentu Sustentavel 14 nian” iha Nasoins Unidas, iha Novaiorke, husi loron 5 to’o 9 fulan-juñu.
Ikus liu, analiza ona mós Estratéjia Nasionál kona-ba Empregu tinan 2017-2030, ho objetivu atu hametin no fasilita polítika efetiva sira kona-ba kriasaun empregu, ne’ebé enkuadra iha Planu Estratéjiku Dezenvolvimentu nian tinan 2011-2030.
Ministru Estadu, Koordenadór Asuntus Sosiais no Ministru Edukasaun ninia proposta kona-ba Rezolusaun Governu nian kona-ba dezignasaun data komemorativa sira iha Edukasaun: Loron Nasionál Profesór sira nian (loron 29 fulan-outubru) no Loron Nasionál Ensinu Superiór nian (loron 17 fulan-novembru), hetan ona aprovasaun.
